Regjeringa stoppar billigstraum til datasenter

Oddmund Reisæter Haugen

Arnar Kvernevik (Ap), ordførar i Gloppen

Lokalsamfunn som gjev frå seg natur, fossar og elvar til kraftutbygging skal få noko attende. Det handlar om lokal verdiskaping og kompensasjon for naturinngrep. Når staten tek bort lokale fordelar, svekkjer dei viljen til vidare utbygging. Å skjere alle datasenter over éin kam verkar lite nyansert, då mange er viktig digital infrastruktur med store ringverknader lokalt.

privat

Petter Sortland (Ap), ordførar i Høyanger

Dette var mildt sagt overraskande. Her har departementet jobba i rekordtempo utan å invitere dei aktuelle partane til dialog. Det er ei stor mistyding at kommunane gir vekk krafta gratis; vi har lang røynsle med å optimalisere desse verdiane. Det er jo faktisk større betalingsvilje og evne i datasenterbransjen enn i tradisjonell kraftforedlande industri som Hydro og Elkem.

Geir Olav Slåen

Merete Myhre Moen (Sp), ordførar i Tynset og leiar i LVK

Endringa er korkje varsla, greidd ut eller har vore på høyring. Dette vitnar om mangel på respekt for inntektene til kommunane. Ein bør ikkje straffe kommunar som stiller natur til disposisjon for fellesskapet. Med slike avgjerder vil det stadig bli vanskelegare å få kommunar med på laget som vertskommunar for energiutbygging og bygging av viktig digital infrastruktur i framtida.

Ukjent

Terje Aasland (Ap), energiminister

Datasenter er ei næring som bruker svært mykje straum og som skil seg vesentleg frå alminneleg forbruk. Difor har regjeringa endra tolkinga av kva som er alminneleg forsyning i konsesjonskraftordninga. Det meiner vi er sakleg og rett grunngitt. Vi innfører ei overgangsordning for kommunar som allereie har datasenter i drift, slik at dei får tid til å omstille seg til dei nye reglane.

Ingeborg Grindheim Slinde

Kjell Bøe Bjørgum (Ap), ordførar i Aurland

Dette er nok eit angrep på vertskommunane for kraftproduksjon. Det er eit direkte brot på den samfunnskontakten me inngjekk då me gav vår tilslutning til utbygging av krafta. Fylkeskommunane blir allereie finansierte med store overføringar frå vertskommunane, og dette blir ei rein direkteoverføring frå oss til fylkeskommunen. Slikt skaper ikkje ro rundt vidare vasskraftutbygging.

William Jobling / NRK

Sofie Marhaug, energipolitisk talskvinne i Raudt

Det er veldig gode nyheiter at regjeringa endeleg gjer noko med den hovudlause politikken til Solberg-regjeringa om å gi datasenter billeg konsesjonskraft, noko som lèt dei snike i køen framfor annan industri. At dette har vore definert som alminneleg forbruk av dei borgarlege, har aldri vore føremålet med ordninga. No svekkjer vi utbyggingspresset frå internasjonale tek-gigantar.

Raymond Lidal

Noralv Distad, Kraftfylka

Datasenter kan samanliknast med anna kraftkrevjande industri, som ikkje er med i konsesjonskraftgrunnlaget til kommunane. Større kraftkrevjande verksemder må reknast som regionale verksemder der også fylkeskommunane bør få del i verdiskapinga. At fylka skal ha konsesjonskraft har alltid vore ein del av systemet. Det er kraft ein får tildelt, og ikkje noko ein tek frå kommunane.

Ingeborg Grindheim Slinde / NRK

Andreas Wollnick Wiese (Sp), ordførar i Luster

Dette er direkte distriktsfiendtleg. Det påverkar vår moglegheit til å bruke konsesjonskraft til å byggje gode lokalsamfunn. For meg ser det ut som ein enkel måte for staten å finne finansiering til fylkeskommunane ved å sende sjekkar frå kommunedirektørar til fylkesdirektøren. Det blir heilt feil at det er kraftkommunane som skal bidra til ei betre finansiering av fylkesleddet.

Nils Ole Refvik / NRK

Roy-Egil Stadheim (Ap), ordførar i Vik

Dette kjem heilt ut av det blå. Vi har brukt mykje ressursar på arealplanar for å bruke krafta der ho blir produsert, men no sparkar regjeringa beina under oss. Det er ein arrogant politikk som tvingar krafta bort frå distrikta til sentrale strøk med store tap i linjenettet som følgje. Ein må spele på lag med kraftkommunane om ein skal få bygd ut meir kraft i dette landet framover.

NRK

Bjørn Lødemel, Sogn og Fjordane Næringsråd

Vedtaket svekkjer kraftkommunane si moglegheit til å nytte eiga kraft til lokal verdiskaping og råkar distrikta direkte. Det er eit grunnleggande prinsipp at dei som tek belastninga med naturinngrep, også må få tilgang til å bruke noko av krafta lokalt. Å sende krafta ut av distrikta med tap i linjenettet framstår som både lite berekraftig og samfunnsøkonomisk ufornuftig.