Skred og stengde vegar på Vestlandet: Fleire tusen er isolerte

– Det er ein alvorleg situasjon som er levande heile tida, seier operasjonsleiar Knut Dahl-Michelsen i Vest politidistrikt torsdag morgon.

– Det har vore hendingar med små og store ras og veldig mange stengde vegar. Det er krevjande å halda oversikt over alle områda som er råka, og det gjeld stort sett heile Vestlandet.

Det har regna kraftig mange stader i Vestland, Møre og Romsdal og Trøndelag. Det har gått fleire jord- og steinskred:

• Gaupne i Luster er isolert etter to skred.
• Fleire enn 3000 innbyggarar er isolerte i Sogndal.
• E39 mellom Skei og Moskog i Sunnfjord er stengt på grunn av flom, og innbyggarar i Jølster er isolerte.
• Fire hus er evakuerte etter skred i Kinn. I tillegg er hus i Ullensvang og Voss også evakuerte.
• Både i Ålesund, Molde og Surnadal er fleire menneske evakuerte etter jordskred og mykje regn.

Totalt er fleire tusen menneske isolerte. Kommunane Ullensvang, Sogndal , Luster og Molde har sett krisestab.

Rundt 50 vegar stengde

Det er rundt 50 stengde vegar på grunn av uvêret i Vestland, melder Statens vegvesen. Det er usikkert kva tid dei blir opna.

– Det blir vurdert om det kan startast opprydding i dag. Det er jo framleis eit stort farevarsel som gjeld. Naturen er metta på nedbør, så det vil nok bli gjort gode vurderingar på om det er forsvarleg med å starta oppryddingsarbeidet i dag, seier trafikkoperatør John Andreas Omdal i Vegtrafikksentralen torsdag morgon.

Nokre av vegane som er stengde:

• E39 mellom Skei og Moskog i Sunnfjord.
• E134 ved Håfoss i Etne.
• E39 mellom Kongeneset og Henneelva i Stad.
• Rv. 13 mellom Grimshaugen og Vinje i Voss.

Statens vegvesen ber også folk vurdera om dei kan la bilen stå og om dei må ut på vegane.

– Situasjonen er så uoversiktleg. Vegar kan bli stengde raskt, utan at Vegvesenet rekk å melda det, seier avdelingsdirektør Sven Egil Finden i Statens vegvesen til NRK.

Uvêret stenger også fleire fjellovergangar:

I Trøndelag gir kraftig vind problem. Tusenvis er straumlause og ferjer og hurtigbåtar ligg til kai.

Ei elv i Malvik gjekk over sine breidder natt til torsdag, men det er no kontroll på situasjonen.