Steinar på storleik med bilar hamna vegen

Det har gått eit steinras mellom Hovdetunnelen og Kvernhaugstunnelen på Fylkesveg 55 mellom Høyanger og Vadheim,.

Det skal vere snakk om steinar på storleik med bilar.

– Vi har stengd tunnelane på kvar side av raset. Meldingane vi har fått tilseier at det er snakk om ganske store steinar, seier trafikkoperatør Rolf Einar Vågheim i Statens vegvesen.

Raset gjekk i 15-tida laurdag ettermiddag.

Det er ikkje meldt at bilar eller personar er tekne.

Vegen er stengd, og det er usikkert kor lenge vegen vil blir stengd.

Ifølge byggeleiar i Vestland Fylkeskommune Skule Jacobsen vil dei gjere ein ny vurdering i morgon klokka 12.

– Raset har gått igjennom ei steinur. Den er litt uroleg etter at det har falle ned så mykje stein i den, seier han.

Jacobsen legg til at raset har gått på eit rasutsett fjell.

Ingen gode omkøyringsmoglegheiter

Ordførar i Høyanger kommune Petter Sortland seier at dei har fått sett inn ein båt som går forbi rasstaden, slik at dei som jobbar på Hydro og i helse- og omsorgstenesta kjem seg til å frå jobb.

– Det er veldig problematisk at vegen er stengd, då ein må køyre ein forferdeleg lang omveg for å komme rundt.

Tilrådd omkøyring er via FV55 Høyanger-Hella, RV13 Hella-Sogndal, RV5 Sogndal-Skei, E39 Skei-Vadheim.

Desse omkøyringsrutene tar fleire timar ekstra.

Ifølge BKK var 370 kundar i Høyangerområdet utan straum etter raset.

Litt før klokka 17.30 meldte kommunikasjonssjef i BKK Kristina Kollerud Austrheim at straumen var tilbake hos alle kundane.