«Team Pølsa» kjem tilbake på skjermen

– Det er fantastisk at vi får lov til å lage ein ny sesong, og også at eg får lov å vere med. Det er litt skummelt å skulle følge opp ein massiv suksess, men det er spennande og eg gler meg, seier programleiar Øystein «Pølsa» Pettersen.

Med ulike funksjonsnedsettingar blei seks norske ungdommar sette saman til laget «Team Pølsa», med eit felles mål om å gå eit skirenn under VM i Trondheim i februar. Og det viste dei at dei klarte.

– Nye deltakarar

Det er tidlegare langrennsløpar Øystein Pettersen, betre kjent som «Pølsa», som har vore programleiar og trena ungdommane til å kunne nå målet sitt.

Han fortel at dei i neste sesong får nye deltakarar.

– Det blir nye deltakarar sjåarane får bli kjent med. Vi skal ikkje erstatte dei andre, dei er seg sjølv. Men nye deltakarar blir ein del av det utvida laget.

– Eg håpar vi er med på å skape ei haldningsendring. At vi endrar måten vi ser kvarandre og behandlar kvarandre på. Så blir det spennande å sjå kven som blir gjengen. Det blir rett og slett moro med ein ny sesong, legg han til.

Sett av 1,5 millionar

Den nye sesongen er venta å komme i 2026. Holmenkollen er plukka ut som arena for finalerennet.

– Denne serien har betydd mykje for mange. Ungdommane har blitt forbilde, og både inspirert og rørt publikum med reisa si, seier redaksjonssjef Randi Helland i NRK Fakta.

Også ho gler seg til å setje i gang med å lage ein ny sesong av «Team Pølsa».

Første episode er sett av nesten 1,5 millionar sjåarar. Og i gjennomsnitt er kvar episode sett av heile 1,2 millionar sjåarar.

Det er eit av NRKs mest sette program.

– Det er skyhøge sjåartal, kva tenker du om det?, spør NRK «Pølsa».

– Det er vanvitig. Eg har ikkje kunne gått nokon stad utan at nokon nemner det. Og for ungdommane har det vore ei før-og-etter-oppleving. Noko eg håpar vi kan bygge vidare på, seier han.

«Team Pølsa» rørte ikkje berre ein heil nasjon, men også store stjerner som Martin Ødegaard. Sjå helsinga hans til deltakar Syver her:

Les meir: