Trondheims ordførar ut mot russisk ski-deltaking: – Håper dei ikkje kjem

– Eg håper dei ikkje er å finne på startstreken i Granåsen til helga, seier ordførar i Trondheim, Kent Ranum (H).

Tidlegare tysdag blei det klart at det russiske skiforbundet har fått medhald i sin anke mot CAS.

Det betyr at russiske utøvarar får delta i internasjonale renn.

Første moglegheit er allereie til helga når det er verdscup i Granåsen.

– Eg synest det er ein skuffande avgjerd, seier Ranum.

– Fullstendig feil

Ordføraren seier russiske utøvarar burde bli heldt utanfor internasjonale renn så lenge krigen i Ukraina går føre seg.

– Eg meiner det er fullstendig feil at russiske utøvarar skal få lov til å delta i internasjonale konkurransar så lenge krigen i Ukraina går føre seg.

– Det sa eg før Ski-VM også og mitt standpunkt har ikkje endra seg i det heile tatt.

Ordføraren fortel at nyheita enda er fersk og at han ikkje har full oversikt over kva avgjerda frå CAS betyr.

– Eg håper dei ikkje kjem.

– Så er det lovar og reglar som regulerer korleis vi eventuelt må ta i mot dei dersom dei kjem, men der er det skiforbundet som er nærare for å svare på det.

Trur det er for tidleg med Trondheim

– Sånn i utgangspunktet så kjem det jo for tidleg, seier renndirektør for kombinert, Lasse Ottesen.

Første konkurransedag i Granåsen er allereie fredag.

– Det eine er sjølvsagt at vi har påmeldingsreglar, der ein må melde seg på ein del veker i forkant.

– Det å melde seg på i dag eller i morgon er jo veldig nære og veldig kort frist.

Samstundes fortel Ottesen at dette truleg vil bli diskutert internt i rennleiinga.

– Der må vi nok vere litt meir fleksible, i og med at den avgjerda blei tatt så nær innpå sesongen vår.

– Men det er klart, uansett så høyrast jo Trondheim ganske hektisk ut for alle dei russiske utøvarane som eventuelt ønsker å vere med.

– Kjem med helikopter

I ei utsegn gjeve att av mellom anna Championat, spøker den russiske landslagssjefen, Egor Sorin, med at den russiske leiren kjem til Granåsen.

– Trondheim er ein moglegheit, absolutt. Vi kjem med helikopter!

Deretter fortset landslagssjefen:

– Vi avventar svar frå FIS på kva som skjer vidare.

Men i eit slikt helikopteret sit ikkje Veronika Stepanova. Ho svarer klokkeklart «nei» til NRK på spørsmål om ho vil gå i Trondheim.

– Vi skal lage gode skirenn

– Vi er arrangør, vi er ganske langt nede i rekka her. FIS og Noregs skiforbund må få meine noko om dette, så må vi forhalde oss til det som kjem.

Arrangementsansvarleg for verdscupen i Trondheim, Daniel Myrmæl Helgestad, fortel at dei forheld seg til det som blir bestemt.

– Mitt ansvar er å lage skirenn fredag, laurdag og søndag. Eg forheld meg til det.

– Vi skal lage gode skirenn for dei som står på startlista.