Trump-bråk i Kristen-Noreg

Dagen-redaktør Vebjørn Selbekk går i rette med dei som har «drukke Trump-gifta» og slukt hans ord om å vere utpeika av Gud med «agn, krok og søkke».

For å understreke alvoret påkallar Selbekk eit profetisk språk:

– Vakne opp! Vend om, før det er for seint, seier han i eit stort intervju med VG denne helga.

Intervjuet har skapt stor merksemd i Kristen-Noreg.

– Takk for tydeleg tale. Eg er skikkeleg uroa over at vi (kristne) lukkar augo for uretten Trump og hans like står for, seier Trude Brosvik, som er KrF-leiar i Vestland.

Sjå fleire reaksjonar under.

– Kristne har late seg blende av sterke førarskikkelsar

Før det amerikanske valet viste ei undersøking blant abonnentane til avisa Dagen at halvparten av lesarane støtta Trump.

Selbekk meiner dei har gitt etter for dei autoritære lengtane sine, og viser til sin eigen tyske bestefar som deltok i folkemordet på Austfronten under andre verdskrigen:

– Dessverre viser historia at kristne også tidlegare har late seg blende av denne typen sterke førarskikkelsar, seier Selbekk til NRK.

Åtvaringa om at fleire av hans eigne lesarar er «forblinda» og «på ville vegar» har i sin tur skapt ein kraftig motreaksjon.

I djupet av Kristen-Noreg innvender fleire at det er nettopp Selbekk som har gått seg vill og late seg dupere.

Ikkje av Trump, men av evangeliet til den gudlause liberalismen.

Fleire gjer eit poeng av at treet skal «kjennast på frukta» og at Trumps eige åndsliv – eller fråvær av det – er saka uvedkommande:

Det blir vist til at heller ikkje persarkongen Kyros hadde den rette trua, men at det i år 538 før Kristus var nettopp han som frigjorde det jødiske folket i Babylon.

– Gud har blitt politisk potent igjen

Omsett til 2025 blir det vist til at Trump har stått klippefast i forsvaret av det ufødde livet og Israels rett til å verne seg.

Og at den same presidenten sist veke oppretta eit eige «White House Faith Office» for å «nedkjempe antikristne fordommar».

Andre gjer eit poeng av at kristne på ny snakkar med kraft og frimot, om alt frå grensesetting til «rosa kompetanse». Med Trump som hyrding og vegryddar.

«Gud har blitt politisk potent igjen», skriv kommentator i Morgenbladet, Ingeborg Misje Bergem.

Utgangspunktet er kristendommen sitt comeback som fundament og kulturell kraft – om enn ikkje på den måten Den norske kyrkja såg for seg:

– Plutseleg strøymer folk til. Kristendommen har stått opp frå dei døde, men ikkje fordi han har blitt meir open og inkluderande, skriv Bergem.

Dette er bakgrunnen for ei identitetskrise i Kristen-Noreg, fortset ho.

– Trumps politiske bruk av kristendommen er ei utfordring for kristne over heile verda, som for første gong på mange år ser at tru igjen er eit tema folk faktisk bryr seg om.

– Har blitt frådømt kristentru, moral og all form for intellektuell kapasitet

Leiar for Kyrkjerådet i Den norske kyrkja, Harald Hegstad, seier til NRK at kyrkja «skal romme eit mangfald av menneske med ulike politiske meiningar».

– Men vi må protestere når grunnleggande verdiar blir trua.

– At vi nå ser auka oppslutning om og interesse for kristen tru, ser eg primært som eit uttrykk for at menneske søker forankring i ei uroleg tid, ikkje som tilslutning til ekstreme synspunkt.

Eit par døgn etter VG-intervjuet har Selbekk fått summa seg.

– Reaksjonane er som venta. Eg har blitt frådømt både kristentru, moral og all form for intellektuell kapasitet. Men eg har også fått eit tresifra tal takk for at eg seier frå, seier han.

Han gler seg over at fleire – inkluderte ateistar – har fått auga opp for trua og presiserer at det er «bra at kristne kjempar for det dei trur på, også i politiske spørsmål».

– Det helsar eg velkommen. Men for meg er det ein «deal-breakar» at Donald Trump ikkje er ein demokratisk innstilt person. Vi bør klare å oppdage ein autoritær, udemokratisk leiar når teikna er så tydelege som her.