Vann Mesternes mester etter dramatisk finale: – Trudde eg skulle ryke ut tidleg

– Eg var letta då eg endeleg kunne ringe i bjølla til slutt, seier Edvald Boasson-Hagen.

På arenaen står den tidlegare proffsyklisten med det synlege beviset på sigeren i Mesternes mester.

Det heile blei avgjort på ei brennheit strand i Nord-Spania.

Kampen om tittelen stod mellom Hagen, hoppar Daniel-André Tande og fotballspelar Isabell Herlovsen.

Herlovsen hadde fleire sjansar til å ta sigeren, men bomma i den avgjerande augneblinken.

– Edvald har jo vist at han er ein verdig vinnar. Han har gjort det bra i veldig mange øvingar, så det var veldig fortent at han vann, seier Herlovsen.

– Det var veldig, veldig gøy å ta sigeren, seier Hagen, men fortel at vegen fram var tung.

I den aller siste duellen venta ei krevjande hinderløype for finalistane. Dei blei testa i både styrke, balanse, presisjon og logisk tenking.

Jamn kamp

Hagen tok fort leiinga, men det var først då han kom til memoreringsoppgåva at han verkeleg byrja å få trua.

– Ein veit jo aldri heilt før ein er der, men etter den memoreringsoppgåva byrja eg å føle meg sikrare, fortel han.

Den tidlegare proffsyklisten leia heilt til siste øving, men Herlovsen tok kraftig innpå. Det var berre snakk om sekund for Hagen.

– Eg var ikkje roleg før eg trefte dei siste elementa og kunne ringe i bjølla, fortel han.

– Trudde eg skulle ryke ut veldig tidleg

Hagen legg ikkje skjul på at han i starten av sesongen var usikker på eigne ferdigheiter i eit så allsidig selskap.

– I starten trudde eg faktisk at eg kom til å ryke ut veldig tidleg. Prestasjonane har svinga litt, men snittet har vore bra. Ein får jo eit håp jo nærmare ein kjem, seier vinnaren.

Også finalist Herlovsen skildrar opphaldet som ein sportsleg berg-og-dal-bane. Ho var ikkje budd på at ho kom til å stå i finalen.

– Eg hadde ikkje sett for meg dette før eg drog hit. Ein periode låg eg heilt på botnen, men det har vore ei stor ære å få vere med og dele dette med så mange fine folk, fortel ho.

– Meistrar forskjellige ting

Hagen er audmjuk når han pratar om kva han har fått til denne sesongen av Mesternes mester. Han har fleire veker kjempa om topplasseringar i konkurransane.

– Nokre vil nok kanskje bli overraska. Sykling er kanskje ikkje den mest allsidige sporten, men i løpet av denne sesongen har eg fått vist at eg kan meistre litt forskjellige ting. Eg har vel bevist at eg har fleire strenger å spele på, seier han og smiler.

Han trur den varierte treninga opp igjennom åra har vore nøkkelen.

– Eg har alltid likt å trene variert, både på ski og andre ting som krev balanse og koordinasjon. Det har nok hjelpt meg i dag.