Vanskelege køyreforhold – bilane sklir sakte, men sikkert av vegen

– Det er spesielt Innlandet som har merka glatte vegar der det regnar på minusgrader i bakken, seier trafikkoperatør Barbro Evensen Venhagen i Vegtrafikksentralen Aust til NRK rundt midnatt natt til søndag.

Det er spesielt områda Elverum, Hamar og nord for Hamar og Gjøvik-traktene der det er veldig vanskelege køyreforhold.

Alle entreprenørar har både saltbilar og strøbilar ute.

– Problemet er at der det ikkje er nok trafikk, så held ikkje saltet altfor lenge. Og der dei har strødd har ein del regna bort, seier Evensen Venhagen.

– Bilane sklir sakte, men sikkert av vegen og blir ståande i grøfta. Ved fleire vegar, som rv. 3 og rv. 2, har bilane stansa langs vegen og ventar på strøbil, seier ho.

Som legg til at dersom du ikkje må ut og køyre, så er det best å la bilen stå.

Vegtrafikksentralen seier at dette ikkje er natta for å køyre ut med halv tank verken på drivstoff eller straum.

– Sørg for å ha full tank og ikkje minst ha varme klede i bilen, seier ho.