Veks midja i takt med alderen? Forskarar kan ha funne svar på kvifor

Det er ikkje tvil om at mage og midje utvidar seg om matlysta er stor og aktivitetsnivået er lågt.

Men mange opplever at midjemålet blir breiare med alderen same kva ein et. Og no viser ny forsking på mus at dette ikkje treng å handle berre om kosthald.

For etter kvart som kroppen blir eldre, ser det ut til at stamceller i feittvevet speler ei viktig rolle i produksjonen av magefeitt. Aldring aleine ser nemleg ut til å føre til ei nydanning av feittceller, skriv forskarar i ei pressemelding.

Som om det ikkje er vanskeleg nok å halde feittet unna, tenker du kanskje ...

Men fortvil ikkje, det finst faktisk ei god nyheit i dette funnet:

– Dette kan føre til nye medisinske løysingar for å redusere magefeitt og forbetre helsa til vaksne menneske. Det seier Qiong Wang ved City of Hope, som er eit av USAs mest anerkjente senter innan kreftforsking.

Magefeitt og sjukdom

Det å ha ein litt større mage midt i livet enn det ein hadde som 20-åring, er heilt normalt. Men blir det for mykje feitt i dette området, kan det ha konsekvensar for helsa di.

For magefeitt akselererer aldring og bremsar stoffskiftet. Det aukar igjen risikoen for å utvikle diabetes, hjarteproblem og andre kroniske sjukdommar.

Og så langt har det eigentleg vore eit lite mysterium kvifor alderen forvandlar sixpacken din til ein litt mjukare og annleis versjon.

I alle fall fram til nå: Syndaren er nemleg ein spesiell type stamcelle kalla adipocytt-precursorcelleI.

Slik gjekk dei fram

I den nye studien fokuserte forskarane på det som blir kalla visceralt feittvev hos mus. Dette svarer til det som ofte blir kalla bukfeitt hos menneske. Dette feittet legg seg rundt dei indre organa våre, og aukar med alderen.

For å finne ut av kva som faktisk skjer, transplanterte forskarane APC frå både unge og eldre mus til unge mus. Då oppdaga dei at cellene som kom frå eldre mus produserte betydeleg fleire feittceller enn dei frå dei yngre.

Dette gjaldt først og fremst middelaldrande individ. For i gamle mus fann ein ikkje den same produksjonen av feitt.

Funna viste også at aktiviteten var høgare i hannmus enn i homus. Tilsvarande celler blei også funne i visceralt feitt frå menneske, og også her auka andelen med alderen.

Men det er ennå for tidleg å seie om effekten er den same i menneske som i mus, forklarar forskarane.

– Dette er interessant, seier Johan Fernø. Han forskar på mykje av det same ved Haukeland universitetssjukehus i Bergen.

Kan bidra til mindre stigma

– Det ser ut til at det skjer noko med desse cellene i ein viss alder, og det er litt overraskande, seier Fernø til NRK.

Han meiner oppdaginga er positiv, spesielt i éi retning – at det kan bidra til å redusere stigma rundt fedme.

– Dette viser at biologiske mekanismar sørger for at vi lagrar meir feitt. Det er altså biologien som styrer det, og ikkje ein sjølv. Framleis i dag er det slik at ein i stor grad oppfattar fedme og fedmerelaterte sjukdommar som sjølvpåførte, så dette er med på å motbevise det.

Sjølv om dei amerikanske forskarane jobbar vidare med å finne ut av korleis ein kan stanse denne utviklinga, trur den norske eksperten at dette er noko vi må akseptere.

– Det er ein del ting vi ikkje kan påverke like lett, for med alderen skjer det endringar. Ein må for eksempel akseptere ei ny rynke eller at håret fell av, og dette er litt det same.

Fernø påpeikar likevel at det er mogleg å bremse desse prosessane. Og at ein da kanskje kan redusere grada av følgesjukdom knytt til auka feitt i magen.