Warholm utklassar Ingebrigtsen på poengliste: – Kjem til å skape diskusjon

Da klokka stoppa på 45.94 sekund etter at Karsten Warholm sprang inn til OL-gull i 2021, innkasserte nordmannen samtidig 1341 poeng for prestasjonen.

Ingen nordmann har nokosinne oppnådd ein så høg poengsum, og berre åtte personar gjennom friidrettshistoria ligg framfor han på lista.

– Det synest eg er veldig fint. Eg veit jo at tida 45.94 har vore rangert ganske høgt. Det er eg sjølvsagd fornøgd med at poengtabellen seier, seier Karsten Warholm til NRK.

Det er World Athletics sin offisielle poengtabell som reknar ut kor høg score kvar einaste prestasjon i friidrett er verd, og er rekna som den næraste måten å samanlikne øvingar på tvers av greinene.

– Eg synest heller ikkje det er ufortent, for å vere ærleg. Det krev litt å komme seg dit, forklarer Warholm.

Sjå topp-ti-lista lenger ned i saka.

• Warholm spring 300 meter hekk på Bislett Games. Sjå og følg på NRK frå kl. 20.00.

Ingebrigtsen ikkje i nærleiken

Det norske folket har vore bortskjemte dei siste åra når det gjeld norske friidrettsprestasjonar. Jakob Asserson Ingebrigtsen har stått i spissen, og har sett fleire verdsrekordar.

I Monaco i fjor sprang han inn til europeisk rekord på 1500 meter. Likevel er den prestasjonen «eit hav» bak Warholm, ifølge poengsystemet.

– I utgangspunktet, så tenker eg at det er eit bra system for å få ei meir rettferdig kvalifisering til meisterskap, men det å samanlikne prestasjonar med kvarandre på kryss og tvers av øvingar er jo ekstremt vanskeleg, seier Ingebrigtsen til NRK.

Om Ingebrigtsen skal oppnå same sum som Warholm, er han nøydde til å springe den raskaste 1500-meteren i verda, og det med god margin. Da må klokka stoppe på 3.23.39 sekund.

Det er verdsrekord med over to og eit halvt sekund, og over tre sekund raskare enn Ingebrigtsens personlege rekord.

24-åringen skryter av prestasjonen til landsmannen.

– Når det er sagt, så er jo den prestasjonen usakleg mange prosent betre enn den førre verdsrekorden. Det er litt det som er basert på verdsrekordane, vil eg tru, som utgangspunkt. Om ein forbetrar det med mange prosentpoeng, vil jo det vere sånn.

Dette må Ingebrigtsen springe for å få lik poengsum som Warholm:

– Eg får godt betalt

Warholm viser til at han måtte senke den tidlegare verdsrekorden til Kevin Young med 84 hundredelar for å oppnå den poengsummen.

– Da kan ein begynne å regne kor mykje prosent forbetring i det å samanlikne det med andre. Veldig mange vil seie at nesten eit sekund på 400 meter er ganske mykje. Og det er det, seier Warholm.

Dette er dei ti høgast poengsummane gjennom tidene:

NRKs friidrettsekspert, Vebjørn Rodal trur ikkje utøvarane tenker altfor mykje på poenga dei oppnår.

– Det er rettferdig innanfor kvar øving. Så trur eg dei fleste utøvarane er meir opptatte av resultat, rekordar og medaljar enn dei er av poenga som resultata gir.

– Warholms sprang på 45.94 er eit heilt enormt friidrettsresultat, men eg meiner ikkje at det er betre enn 3.23.39 på 1500, som Jakob Ingebrigtsen må ha for å oppnå tilsvarande poengsum, seier Rodal.

– At sånne tabellar kjem til å skape diskusjon, det er eg heilt overtydd om, men det er jo ikkje eg som har laga tabellen. Sånn sett får eg berre takke og bukke, for eg får godt betalt, svarer Karsten Warholm.

• NRK har spurt World Athletics om ein kommentar om poengsystemet, men har ikkje fått svar på førespurnaden.