Anke i Frosta-saka: – Det hadde vore veldig deilig å sette punktum

Fredag 6. juni blei den tidlegare kommuneoverlegen i Frosta dømt til 21 år i fengsel i Trøndelag tingrett.

Måndag blei det kjent at den tidlegare kommuneoverlegen ankar dommen.

– Det hadde vore veldig deilig å sette punktum no, for ein blir jo sliten av det, seier Randi Vinge.

Ho er ei av dei 94 fornærma kvinnene i saka og ei av dei som varsla om Arne Bye allereie i 2006.

– Eg kjenner at han har tatt ein så stor del av livet mitt, og eg var litt forberedt på å få lov til å fortsette, bli ferdig og gå vidare utan at han er ein del av kvardagen.

– Vi har blitt sterkare og tøffare

Måndag stadfesta Bye sin forsvarar at den tidlegare kommuneoverlegen vil anke på alt han er dømt for, også dei tilfella der han i tingretten erkjente straffskuld.

Tingretten fann Bye skuldig i å ha valdtatt 70 av sine tidlegare pasientar og i å ha misbrukt stillinga si overfor 82 av dei.

Ei eventuell ankesak vil begynne 27. eller 28. oktober i Frostating lagmannsrett.

Vinge trur dei fornærma kvinnene skal klare å gå gjennom ei eventuell ny sak.

– Eg har følelsen av at dei fleste har blitt sterkare og tøffare og synest det er litt lettare å snakke om.

– Har han ikkje tynt oss nok?

Ei anna av dei fornærma kvinnene NRK har snakka med fortel at ho var forberedt på at det kunne kome ein anke.

Beskjeden om at Bye også ankar dei tilfella han tidlegare har erkjent kom meir overraskande på.

– Det var eit lite sjokk eigentleg. Det var sånn ... kva skjer no?

Under rettssaka erkjente Bye straffskuld for å ha valdtatt kvinna og for å ha misbrukt stillinga si overfor henne.

– Ein fell litt tilbake. Det er som ein føler at ein har kome seg litt lengre fram, og så er det rett tilbake igjen, seier kvinna.

– Også blir ein litt forbanna, for eg tenker at har han ikkje tynt oss nok?

– Hadde håpa det var sett punktum

– Det er mange som reagerer med både sinne, frustrasjon og er oppgitte ... Det er mange som tar det tungt, seier Tove Røddesnes.

Ho er bistandsadvokat for mange av dei fornærma kvinnene i saka.

Røddesnes fortel at ho har prata med fleire av dei fornærma etter at det blei kjent at Bye ankar.

– Det er veldig mange som reagerer og hadde håpa at det var sett eit punktum no, seier Røddesnes.

– Mange har lyst til å starte på vegen vidare, så dei opplever at det er vanskeleg.

Røddesnes fortel at det ikkje var heilt uventa at det kom ein anke, men at han også ankar det han tidlegare har erkjent var overraskande.

– Det ligg vel i korta at han trekker erkjenningar her da, det opplevast meir overraskande.

– Har forståing for at fornærma opplever det som belastande

Arne Bye sin forsvarar, Frode Wisth, stadfesta måndag at Bye vil anke alle tilfelle av dommen.

– Det blir anka på alt han er dømd for, sa Wisth til NRK.

Under rettssaka erkjente Bye straffskuld for å ha valdtatt 21 kvinner og for å ha misbrukt stillinga si overfor 44 kvinner.

– Eg har forståing for at fornærma opplever det som belastande. Det ligg i saka sin natur, seier Wisth.

Samstundes peiker han på at det er Bye sin rett å anke dommen han har fått.

– Det er hans rett å anke og den har han nytta seg av.

Dei har i første omgang anka heile saka fordi dei ikkje har hatt tid til å sette seg inn i sakskomplekset.

Wisth viser til at det er omfattande videobevis i saka.

No skal dei lage eit støtteskriv til anken der dei vil gi ei grunngjeving av dei delane av dommen dei vil anke til lagmannsretten.

– Faktum er belyst i dommen frå tingretten. Så skal vi sjå på jussen knytt til det og eventuelt supplere med ytterlegare faktum, forklarar Wisth.

Lagmannsretten har moglegheit til å «ankesile», det vil seie at dei kan nekte å behandle ankesaka.