Knut Hamsun joarkkaskåvllå Nordlándan sjaddá ressurssaskåvllå julevsámegiela hárráj
Dát sihtá javllat skåvllå, åssudagáj Lairákvuonan Stájgon ja Badjesijdan Hábmerin, galggá dal ienep dahkat.
Dát la gæhttjalimprosjækta mij la vihpam moadda jage, ja dalloj lij ulmme:
Galggá julevsáme gielav, kultuvrav ja identitehtav nannit joarkkaskåvlåjn.
Galggá viehkedit dárkestittjat ja åvddånahtátjit buorre åhpadusáv julevsámegielan.
Galggá aj bargov doarjjot låggŋit julevsáme gielav, kultuvrav ja identitehtav divna skåvlåjn Nordlánda fylkasuohkanin.
- Gå galggá sierra tjalmostahttem sáme álmmukbæjvváj, de skåvllå oassálasstá dagoj julevsámegiela hárráj, duola dagu oajvvadusáj gåktu biejvev ávvudit ja oajvvadusájt giela hárráj, javllá fylkkaráde Svein Øien Eggesvik Nordlánda fylkasuohkanin.
Skåvllå l aj barggamin ietjájduhttet namáv Knut Hamsun joarkkaskåvlån ådå nammaj.
- Dát dárojduhttemij guosská. Bájkálattjat de dåbddu vehi gássjel jus Knut Hamsun galggá liehket julevsáme skåvllå, javllá Eggesvik.
Knut Hamsun lij akta dajs åvdemusájs Vuona romádnatjállijs ja ájnas ulmusj goappátjagá 1890-lågo ådåromantihkan ja gasskarijkalasj románalasj girjálasjvuodan.
Sån riegádij jagen 1859 Vågå suohkanin Opplándan, ja jámij jagen 1952.
English (US)