Bråk, fyrverkeri og slagsmål i Bergen sentrum – ber foreldre henta barna sine

Etter ein roleg start på 17. mai-feiringa, har det tatt seg kraftig opp i Bergen sentrum utover ettermiddagen.

Politiet melder om fleire tilfelle av slåsting, ordensforstyrringar og svært rusa ungdommar fleire stader i byen. Særleg i området rundt Strandgaten, Festningskaien og Bryggen har det vore mykje å gjera.

– Me har vore i Strandgaten tre gonger på kort tid på grunn av slåsting og uro, seier innsatsleiar Kent Ove Håland i Vest politidistrikt til NRK.

Ved Burger King i sentrum måtte politiet rykka ut etter melding om fullt slagsmål mellom rundt 20 ungdommar.

– Det blei meldt om ein person som blødde og flasker som blei knuste, skreiv politiet i presseloggen.

Ber foreldre henta barna sine

Då NRK var i sentrum sundag ettermiddag var det fleire tilløp til slagsmål. Fleire stader fekk overstadig rusa personar helsehjelp.

Rundt kl 16.15 blei det sendt fyrverkeri inn i folkemengder som hadde samla seg på Torgallmenningen. Fleire personar blei treft, men ingen såg ut til å ha blitt alvorleg skada.

Politiet har kalla inn ekstra ressursar til sentrum, opplyser innsatsleiar Kent Ove Håland til NRK.

– Eg vil oppfordra folk til å oppføra seg, ta vare på kvarandre og avgrensa alkoholinntaket.

Han understrekar at politiet vil vera tydeleg til stades gjennom kvelden. Og understrekar at folk stort sett oppfører seg.

– Me prøver å halda byen trygg.

Overfor Bergens Tidende ber innsatsleiar Tom Johannessen foreldre koma på banen.

– Me oppfordrar foreldra til å henta barna sine.

Ikkje kapasitet til å loggføra alt

Kort tid etter, klokka 16.34, melder politiet at talet på oppdrag er så stor at operasjonssentralen ikkje maktar å loggføra alle hendingane som går på vald, berusing og ordensforstyrringar i sentrum.

Det er særskilt mykje berusa ungdom rundt Torgallmenningen, Torget og tivoliet på Bontelabo.

I loggen går politiet ut med ei generell oppfordring til foreldre som har ungdom i byen om å ha dialog med dei, og gjerne halde seg edru sjølve.

– Politiet har ikkje kapasitet til å køyre berusa ungdommar heim, seier Brakstad.

– Mange unge jenter og gutar

Ifølgje politiet er det særleg mykje unge jenter og gutar i sentrum som har drukke store mengder alkohol.

Også Helse Bergen merkar at trykket aukar. Det er blitt fleire og fleire helseoppdrag utover dagen.

Egge seier dei fleste hendingane handlar om konsekvensar av store folkemengder og rus.

– Det er mykje av det me driv med til vanleg, men me ser litt konsekvensar av store folkemengder og rusmiddelbruk.

Skadeomfanget omtalar han likevel som relativt avgrensa.