Brann på Tysnes ute av kontroll - seks av åtte næringsbygg har tatt fyr

Det brenn no i sju av åtte næringsbygg, som ligg i ei rekke, ifølgje politiet.

Situasjonen er uavklart og det er fare for at brannen skal spreia seg. Det er ikkje meldt om sakna eller skadde personar.

Det pågår sløkking både frå land og frå sjø.

– Mannskapar frå fire brannstasjonar har rykt ut til brannen, fortel fungerande vaktkommandør ved 110-sentralen, Børre Brekkvassmo.

I tillegg hjelper kystvaktskipet «Tor» og redningsskøyta «Sundt» med sløkking av brannen. Det bles kraftig i området.

Næringsbygga som brenn, tilhøyrer oppdrettsselskapet Alsaker Fjordbruk, og ligg i bygda Onarheim på Tysnes i Sunnhordland.

Det er meldt om mykje røyk i området. Bebuarar må lukka vindauge og vurdera å trekka seg lenger unna området som er utsett for røyk, oppmodar politiet om.

Bygningen som brenn, er del av ei rekke med kontorbygg, som ligg på kaikanten på Onarheim. Bygga har vore under oppføring i fleire år, og nærma seg no ferdigstilt, skriv Bladet Tysnes.