«Can you row us down to Miami?»

Eirik Kristoffer Myking (27) og Andreas Thorkildsen Hjertaker (27) frå Lørenskog var på veg til USA for å sjå 8. delsfinalen mellom Noreg og Brasil.

Då dei tilfeldigvis møtte NRK på Gardermoen rett før avreise, kom dei med sterke lovord:

– Om me får komma vidare, skal me haika frå New York til Miami. Då trur eg me skal prøva å finna oss ein plakat og skriva: «Can you row us down to Miami?», sa Myking.

Då sigeren over Brasil var eit faktum, vart kompisane svoltne på meir VM-feber, og bestemde seg for å halda ord.

Dei tok buss frå New York til Washington D.C., men derfrå var det for alvor på tide å testa haikeferdigheitene langs den amerikanske austkysten.

– Dei aller fleste trudde me var heimlause

Kompisane stilte seg opp langs motorvegen i landslagsdrakter, og som håpa fekk dei også taka i ein plakat, der dei skreiv: «Can you row us down to Miami?».

På eit tidspunkt sat dei også på vegkanten og rodde.

Når NRK slår på tråden fredag morgon, har dei nettopp komme til solskinsbyen.

I løpet av fire dagar har dei haika med amerikanarar i ti ulike etappar.

– Kor lett var det å få skyss?

– Det var eigentleg ganske variabelt. Dei aller fleste trudde me var heimlause. Så var det ganske mange som prøvde å gi oss pengar. Me tok ikkje imot, men til slutt fann me ut at me sikkert hadde tent 1000 dollar om me hadde teke imot alt, ler Hjertaker.

Høge forventningar

Kompisane skildrar turen som ei fantastisk oppleving.

– Me har vorte kjende med ordentleg fine personar på vegen. Og me har rett og slett kost oss veldig, fortel Hjertaker.

Laurdag skal dei sjå Noreg spela ein historisk kvartfinale i VM. Motstandaren er England, og gutane har skyhøge forventningar til oppgjeret.

– Det var heilt vill stemning på Brasil -kampen, så me forventar ingenting anna mot England, seier Myking og avsluttar med eit stikk til den berømte fotballsongen til engelskmennene:

– Me håpar at «they are going home» – eller «we are rowing them home», er det ikkje det heiter?

Hør fredagens episode av Dagens i P1 der de to kompisene ble intervjuet her: