Dette er supertrioen sine eigne kalenderfavorittar

Humortrioen Herman Flesvig, Kevin Vågenes og Mikkel Niva er aktuelle med første sesong av «Nissene i skjul» i NRK TV frå 1. desember.

Der spelar dei ei rekkje ulike karakterar i eit ellevilt nisseunivers.

Men når vi spør dei om kva dei sjølv såg på som barn, kjem nostalgien fram.

– Eg har sterke minne frå «Amalies jul», den var eg veldig glad i, seier Herman Flesvig.

Komikaren legg ikkje skjul på at han som barn også elska «Jul i Blåfjell», serien som blei sendt på NRK første gong i 1999.

– Det var hyggeleg då vi var små, og det som kanskje òg var hyggeleg med det, var at då var det ikkje så mykje anna å sjå på, seier Flesvig.

Skapte eigen tradisjon

Medan deira nye serie «Nissene i skjul» er ellevill karakterdriven humor, har ofte kalenderseriane vore mest for barn.

Mikkel Niva har gode minner frå den tida.

– Det er veldig koseleg å ha noko du kan sitje og sjå på, og følgje gjennom sånne mørke tider.

Sjølv har han og kona skapt sin eigen julekalendertradisjon.

– Fram mot julaftan ser vi alle Harry Potter-filmane, det er har blitt ein tradisjon at vi ser dei gjennom desember, fortel Niva.

Skummel type på TV

Dei tre komikarane er samde om at den norske julekalender-tradisjonen er både viktig og bra, uansett om seriane er retta mot barn eller vaksne.

– Den første eg hugsar at eg såg på var «The Julekalender», seier Kevin Vågenes.

For han – og tusenvis av andre – var særleg figuren nåsåen ein skummel karakter. Denne zombieliknande typen som var på jakt etter nissane.

– Men eg må jo ha sett barneseriar før det, seier Vågenes og ler.

Ber arven vidare

Når dei tre no går på skjermen med «Nissene i skjul», er det med solid arv frå Espen Eckbo og Kristian Ødegård.

Dei skapte «Nissene på låven» i 2001 og serien har gått sin sigersgang både i originalversjon og med ulike oppfølgarar dei siste tiåra.

Då NRK snakka med Eckbo om dette tidlegare i haust, fortalde han at han gler seg til å sjå den nye serien «Nissene i skjul».

– Det er jo ei blanding av stoltheit og skrekk, på ein måte. Men eg gler meg til å sjå serien, sa Eckbo.

Trudde det var ekte

For Herman Flesvig var «Nissene på låven» ei heilt spesiell oppleving då han sjølv var barn.

– Eg forstod ikkje at det var skodespelarar, så eg tykte det var heilt vilt at dei slåst på TV, seier Flesvig lattermildt.

No gler han seg til at publikum får sjå det han og dei andre komikarane har skapt gjennom «Nissene i skjul».

– Eg håpar at folk ler og kosar seg med det. Vi har ikkje halde igjen på noko, vi har berre «gønna» på med vi synest er gøy.