Donald Trump er snart på veg til Egypt og Israel. Der skal han følgje opp våpenkvileavtalen mellom Hamas og Israel som står i hans eige namn.
Ifølgje Trump sjølv skal avtalen vere slutten på 3000 år med konflikt og starten på «evigvarande fred» i Midtausten.
Han får applaus for arbeidet så langt. Men ekspertane er einige: mykje arbeid er att.
I Egypt og i hamnebyen Sharm el-Sheikh førebur dei at den amerikanske presidenten skal kome på besøk.
Foto: KHALED DESOUKI / AFP / NTB– Eg er uroa for at Trump ikkje har respekt for kompleksiteten i oppgåva administrasjonen hans har teke på seg.
Det skriv den amerikanske kommentatoren Thomas L. Friedman i The New York Times denne veka.
– Det er no jobben verkeleg startar. Det «lette» var å bli einige om denne avtalen. Det veldig kompliserte er vegen vidare, seier utviklingsminister Åsmund Aukrust frå Ap.
Kva må Trump gjere framover for at det skal bli evigvarande fred, slik han har sagt?
– Utruleg
– Det var eit fantastisk stykke diplomati.
Den israelske kommentatoren Tal Schneider i Times of Israel sparar ikkje på rosen når ho snakkar om Trump sitt engasjement for avtalen til NRK.
Tal Schneider
- Politisk og diplomatisk korrespondent i Times of Israel
– Det vi har sett den siste månaden er utruleg, seier ho.
Ho legg til at det hadde vore på sin plass å gje Trump fredsprisen allereie i år.
I Israel får Donald Trump takk og applaus for å fått på palss avtalen som sikra dei angjevelege 48 attverande gissela.
Foto: Shir Torem / Reuters / NTBDen første delen av avtalen mellom Hamas og Israel inneber først og fremst at begge partar skal legge ned våpena, og gislane og fangane skal bli sette fri. I tillegg skal humanitærhjelp bli slept inn i Gaza.
Utveksling gissel og fangar
Hamas skal frigi 20 attlevande gissel. Utvekslinga skal skje innan 72 timar frå avtalen trer i kraft.
Israel skal frigi 2000 palestinske fangar.
Tilbaketrekking av styrkar
Det israelske militæret skal gradvis trekkja tilbake styrkane sine.
Fordrivne palestinarar får venda tilbake til Nord-Gaza og Gaza by.
Naudhjelp skal inn
Minst 400 lastebilar med naudhjelp skal sleppe inn i Gaza dei først fem dagane. Etter det skal naudhjelpa auka gradvis, ifølgje Hamas.
Fleire punkt gjenstår
Både den israelske regjeringa og Hamas har godkjent fredsplanen, men første del inneheld få kjende detaljar. Punkt som avvæpning av Hamas og korleis Gaza skal bli styrt, gjenstår å diskutera.
I fase to av planen skal Israel trekke seg enno lengre ut av Gaza, Hamas skal avvæpnast og ein internasjonal styrke skal vere i Gaza for å sikre at alle held avtalen.
Så skal Gaza byggast opp att.
Den store tryggingsutfordringa
For israelarar er det tryggingsutfordringane med oppbygginga som uroar mest.
– Korleis sikrar vi oss at Hamas ikkje går tilbake til terror?, er eit særleg viktig spørsmål for Schneider.
Under oppbygginga av Gaza vil mykje byggemateriell bli frakta inn på kyststripa.
Både menneska og bygningane i Gaza må bli bygde opp att etter to år med krig.
Foto: AFP– Når ein startar å få inn byggemateriell, er ei stor uro for oss israelarar at terrororganisasjonen kjem til bygge opp att infrastrukturen sin med desse materiala, seier Schneider.
Ho legg vekt på at alle partar har ei rolle i å verne Israel i oppbygginga, men håpar Trump vil spele ei sentral rolle også her.
Det håpar statssekretær i utanriksdepartementet, Andres Kravik frå Arbeidarpartiet også.
- Statssekretær i utanriksdepartementet (Ap)
– Eg trur det er viktig at Trump engasjerer seg i avtalen også etter at den er signert, seier Kravik.
– For å få varig fred må særleg USA legge press på Israel for at dei ikkje kjem på unnskyldningar for å ikkje binde seg til avtalen.
Interessert i å følgje med på det som skjer i verda? Høyr podkasten «Urix» her, då vel:
Publisert 11.10.2025, kl. 20.06
English (US) ·