Drapssikta 33-åring blir ikkje lauslaten likevel

Hordaland tingrett ville i førre veke lauslata den 33 år gamle mannen som er sikta for drap på Frekhaug i Alver.

No har Gulating lagmannsrett bestemt at han må bli sitjande i varetekt. BA omtalte avgjerda først.

Kritikk til politiet

Hordaland Tingrett la til grunn at det framleis er skilleg grunn til å mistenkja den sikta for drap. Dei meinte at det er fare for unndraging av bevis. Dei meinte likevel at det ikkje ville vera forholdsmessig å halda sikta varetektsfengsla.

Denne konklusjonen er lagmannsretten ueinige i. Fleirtalet der meiner at alternativ til fengsel ikkje er gode nok for å hindra unndraging av bevis.

Dei skriv «Siktede vil ha en oppfordring til å forlate landet dersom han blir løslatt. Meldeplikt vil i så tilfelle ikke være tilstrekkelig til å hindre dette».

Derfor må mannen sitja i fengsel vidare.

Lagmannsretten kjem også med kritikk til politiet. Dei skriv at politiet neste gong må grunngi konkret kvifor dei vil halda den sikta mannen fengsla, og at det ikkje held å visa til tidlegare dokument.

«Dette er svært lite hensiktsmessig når det er en ny dommer som skal vurdere saken, og vedkommende tvinges til å gjennomgå alt tidligere materiale. For lagmannsretten utgjør saken 4562 sider».