2 days ago
9
Svak norsk krone mot euro gjer at det er 42 prosent billegare for ein tyskar i Noreg. Kjennest det slik?
Publisert 28.08.2025 08:41
Dei siste åra har talet på utanlandske studentar til norske studiestader auka betrakteleg.
På Universitetet i Bergen har talet på internasjonale studentar auka med rundt 28 prosent sidan 2015, frå 1865 til 2390 viser tal frå DBH.
På NTNU? Auke på 38 prosent.
Universitetet i Oslo er den einaste som har hatt ein nedgang, med rundt 13 prosent færre internasjonale studentar i år enn for ti år sidan.
Mykje har endra seg sidan då. Mellom anna har den norske krona svekkan seg mot euro.
Dette gjer det i teorien billegare for europearar å leva i Noreg enn for ti år sidan.
Studentar: – Framleis dyrt
Tyske Lina Wagner er på utveksling i Bergen, og studerer psykologi. Ho reagerer på prisane her til lands.
– Eg merkar det mest på matbutikken, seier Wagner.
Ho merkar på ingen måte at euroen har styrka seg mot krona det siste tiåret.
– Det er framleis jævlig dyrt. Mange sa til meg at det var dyrt, men eg trudde ikkje forskjellen var så stor, seier Wagner.
Ho, og mange andre studentar, er på Studenttorget, på jakt etter organisasjonar og aktivitetar.
I motsetnad til Wagner, har studievenninna hennar Merle van Hejden vore i Noreg før.
I 2019 jobba ho som budeie på ein gard nord for Lillehammer. Ho merkar at forskjellane mellom landa har minska sidan då.
– Det kjennast litt rimelegare ut no. Om ikkje så mykje på prisane, så i alle fall på vekslingsraten, seier van Hejden.
Og det tar ho ikkje feil i. Ein euro kosta i 2015 mellom 8 og 9 kroner.
I år er ein nærare 12 kroner.
– Godt å vera tysk i Noreg
Robert Næss er investeringsdirektør i Nordea. Han har rekna på husleigestatistikken i Noreg og Tyskland.
– Det er deilig å vera tyskar, eller utlending, i Noreg, slår Næss fast.
– Sidan krona har vore svak så har husleiga i Noreg gått ned jamt og trutt sidan 2012. Dei har steget i Tyskland.
I forhold til den tida kjem ein tyskar til å oppleva at husleiga i Noreg er 42 prosent billegare enn tidlegare samanlikna med kva ein betaler i Tyskland.
Ein treng ikkje gå lenger tilbake enn fem år før det allereie er rimelegare i dag.
For ein tyskar er der 20 prosent billegare å kjøpa ting i Noreg i dag kontra i 2020.
Endring i skulepengar
Det auka tilfanget av internasjonale studentar er ein ynskja politikk frå regjeringa, og frå universitet og høgskular.
– Eg er oppteken av at norske universitet og høgskular er attraktive stader for internasjonal studentar, fordi me treng mangfald og kompetanse, seier forsking- og høgare utdanningsminister Sigrun Aasland.
Hausten 2023 blei det innført skulepengar for internasjonale studentar utanfor EU/EØS og Sveits. Dette førte til nedgang i internasjonale studentar.
I vår snudde den Ap-leia regjeringa, og studentar frå EU/EØS kunne studera i Noreg utan å nødvendigvis betala skulepengar. Frå no er det universiteta sjølv som bestemmer kva avgifta skal vera.
Ifølge Aasland er dette ei ordning som fungerer bra.
– Det mange opplevde var at fordi me har eit høgt kostnadsnivå i Noreg, så vart dei prisa ut og fekk ikkje dei internasjonale studentane som då reiste til andre land i Europa.
English (US) ·