Får huda full etter dette: – Det er så respektlaust

– Det er så respektlaust. For ein homofob person, skriv Marine Tondelier på X.

Ho er leiar av det franske partiet Les Écologistes, det grøne partiet i fransk politikk og kritiserer bildet fotballprofilen Nemanja Matic har lagt ut på same sosiale medium.

På bildet held Matic rundt lagkamerat Alexandre Lacazette etter den siste kampen til sistnemnde for Lyon. På armen ser ein tydeleg at Matic har teipa over eit symbol som spelarane i den franske ligaen hadde på drakta til siste serierunde.

Risikerer kampstraff

Den franske ligaen har køyrt den same kampanjen til siste runde sidan 2021. Målet med kampanjen er å førebygge homofobi.

Alle spelarane hadde to symbol på trøya si: Ligue 1-logoen med regnbogefargar og teksten «homofobi» kryssa over med ordet «fotball» skriven.

Fleire spelarar valde i år å ta aktive grep mot kampanjen ved å ta ein kvit teip over Ligue 1-logoen med regnbogefargane.

– Eit nytt nivå av vondskap å teipe over eit symbol som rett og slett er mot diskriminering, skriv journalist for anerkjente The Athletic, Adam Crafton, på X.

Men det er ikkje første gong liknande protestar har skjedd.

Seinast for eitt år sidan blei Mohamed Camara utestengd i fire kampar for å ha nekta å delta i kampanjen.

NRK har prøvd å komme i kontakt med agentselskapet til Matic, men har foreløpig ikkje fått svar. Heller ikkje klubben har svart på NRK sine spørsmål.

– Håpar det får ein reaksjon

Gjert Moldestad er tidlegare talsperson i Norsk Supporterallianse (NSA). Han er sjølv homofil fotballsupporter og har blant anna vunne Gi rasisme raudt kort-prisen for arbeidet sitt med å gjere idretten meir open og inkluderande.

Han er lite imponert.

– Han tar jo eit veldig tydeleg standpunkt om at han er mot ein kampanje som har som mål om å få vekk homohets. Det hadde vore interessant å spørje han om han synest homohets er greitt, for det er i prinsippet det han seier, meiner Moldestad.

Moldestad synest han ser ei rørsle i samfunnet der fleire og fleire tar til orde mot bodskapar som denne kampanjen.

– Når han vel å gjere dette, så er det mange som tenker at eg kan gjere det same. Da er det plutseleg greitt med homofobi. Nå har dei fått eit høve til å seie at dette er det lov å vere ueinig i. Det er veldig leitt, eg håpar det får ein reaksjon, seier Moldestad.

Forklarte seg i sosiale medium

Også spiss i Nantes, Mostafa Mohamed, nekta å ta del i kampanjen. Ifølge svenske Expressen gjekk Mohamed ut på Instagram og forklarte kvifor allereie før runden i helga.

– Eg er ikkje komfortabel med å snakke om dette i offentlegheita, men i dag kjenner eg behovet for å forklare meg, skreiv Mohamed.

– Djupt forankra verdiar, knytt til opphavet mitt og trua mi, gjer det vanskeleg for meg å vere ein del av eit slikt initiativ. Eg trur på gjensidig respekt – respekten vi skuldar kvarandre, men også respekten vi skuldar oss sjølve og trua vår, skreiv Mohamed vidare.

Den egyptiske spissen gjorde det same for to år sidan, også da nekta han å vere ein del av kampanjen. Den gongen blei han bøtelagd av klubben før klubben donerte pengane til ein organisasjon mot homofobi.