Fekk rasande supporterar på nakken: – Ein får mykje kjeft

– Ei fantastisk tid. Eg fekk oppleve Ligue 1, høgt nivå og gode fotballspelarar. Og å få jobbe i Saint-Étienne, det er ein fotballgalen by.

Slik startar Eirik Horneland mimringa tilbake til tida i Frankrike i måndagens episode av NRK-podkasten «Bakrommet».

Det er halvannan månad sidan han rydda kontoret og var ferdig som Saint-Étienne-trenar.

– Når eg snakkar no, for første gong etter at eg var i Frankrike så blir det plukka opp, så eg må vere litt smart trur eg, ler Horneland.

For ein ting er sikkert: trykket og engasjementet frå fansen var massivt.

– Det er ein fantastisk fanskare der nede, og eg hugsar før vi møtte Lyon i derby, så var det 10.000 som følgde treninga på stadion.

Horneland beskriv ei enorm interesse – på godt og vondt.

– Om ein ser på kampane vi spelte, så blei éin stoppa etter 60 minutt – då stod stadion i fyr – og eg har vore med på mange kampar som har blitt stoppa på grunn av opptøyar. Det er mykje meir emosjonelt, fortel han.

Og det fekk ein kjenne på om ting ikkje gjekk vegen.

– Når dei ikkje er fornøgd i Saint-Étienne, gir dei klart uttrykk for det. Både med banner på treningssenteret og at dei møter opp. Ein får mykje kjeft, men det er ein del av den «passionen» som ligg i slike klubbar.

Høyr den nyaste episoden av «Bakrommet» her!

– Aldri opplevd før

Horneland kom til den franske klubben i 2024, og fekk litt over eitt år i sjefsstolen i Aust-Frankrike.

– Det var store forventningar og ein «passion» eg aldri har opplevd før. Utruleg gøy. Det var gøy det første halve året.

Horneland sitt Saint-Étienne hamna på ein 17.-plass i Ligue 1 førre sesong.

– Når du rykkjer ned får du alle utfordringane med at du dreg med deg spelarar som ønskjer å vere på eit anna nivå, ned til eit nivå dei ikkje ønsker å vere på.

Han held fram:

– Den sommaren og månadene etter lærte eg mykje med tanke på å handtere spelarar som helst vil vidare. Det var ei utfordring.

– Komplisert

Horneland fortel at det i byrjinga var vanskeleg både med språk og kultur.

– Eg snakkar norsk og engelsk, og der nede går det veldig mykje på fransk. Det var komplisert for meg å lære meg fransk, og komplisert for ein del av spelarane å lære seg engelsk.

Det var mange kulturar og nasjonar i han sin garderobe i Frankrike.

Dermed måtte han jobbe ekstra med å få på plass eit godt fotballspråk.

– Det tek nok litt lengre tid å byggje ein sterk kultur rundt det, enn slik eg gjorde i Brann der vi bygde rundt det skandinaviske.

Byte beite

Sidan han takka for seg i den Franske klubben har Horneland stått utan klubb. Han har blant anna blitt linka til skotske Aberdeen.

– Hadde eg hatt lyst til å vere i jobb hadde eg vore det, men eg har sett meg sjølv i ein liten pause fram til etter VM.

For fram til det skal han vere ekspert for NRK.

– Ekspert, det er stort ord, seier Horneland.

Ei litt uvand titulering, skal ein tru han sjølv, men han er krystallklar på at han skal komme med klare meiningar.

– Det blir spennande å jobbe på denne sida av fotballen, og eg gler meg veldig til det, seier han i episoden.

Horneland skal både vere NRK-ekspert under fotball-VM-et i sommar og ein del av «Bakrommet».