Fem ting du må vite om lading av elbil i kulda

Det er minst to ting som påverkar elbilane nå når temperaturen er låg. Det eine er kortare rekkevidde, og det andre er lengre ladetid.

Anten du brukar ein lyn- eller hurtigladar, tek det lengre tid om batteriet er kaldt.

– Tala våre viser at det er nesten 30 prosent lengre ladetid no i januar enn det er på ein sommardag, seier Odd Olaf Askeland.

Han er «head of public charging» hos Eviny, og har bokstavleg talt vore ute ei vinternatt før.

Her er hans beste råd for lading om vinteren:

1: Legg inn ladestopp i GPS

– Optimal ladetemperatur på sjølve batteriet er 20 grader. Derfor er det mange bilar som forvarmar batteriet til denne temperaturen. Men det skjer ikkje nødvendigvis av seg sjølv seier Askeland.

Bilen må ha registrert at du skal på eit ladestopp i navigasjonssystemet, eller du kan legge det inn i systemmenyen i bilen.

Om du ikkje gjer det, skal du ha køyrt relativt langt før batteriet har denne temperaturen.

2: Sett på forvarminga ei god stund før lading

Det tek tid før batteriet har optimal ladetemperatur. Litt avhengig av bilmodell er det ulik grad av isolasjon rundt batteriet, så her må ein sjekke bruksrettleiinga til bilen.

– Batteriet på bilane skal helst vere på 20 grader, ikkje minus 20, som det gjerne er om du set deg inn i ein kald bil og køyrer rett til ein ladestasjon, seier Askeland.

3: Lad straks etter køyring

Dersom du har vore på ein lang køyretur, er sannsynlegvis batteriet varmt nok.

Køyrer du til ein ladestasjon etter endt tur, er sannsynet stort for at batteriet er meir mottakeleg for å lade i «normaltempo».

4: Gle deg til framtida

Årsaka til at batteriet ladar saktare i kulde, handlar om elektrolyttar. Det er den flytande væska i batteri som sørger for at ion kan flyte imellom katode og anode.

Høyrest det ut som ein kjemitime, har du heilt rett. Framtida handlar om SSB – solid state batteries, altså ein batteripakke som ikkje har ein flytande elektrolytt.

Akkurat no er det stor spenning knytt til denne teknologien, og det finske firmaet Donut Labs meiner dei har knekt koden.

På tek.no kom denne nyheita ut tidlegare i januar, og det kan også bety redusert brannfare på elbilbatteri.

5: Bli kjent med nokon i ladekøen

Felles skjebne, felles trøyst. Ta med ein termos og nokre julekaker. Slå av ein prat med ein av dei andre som er ute i same ærend som deg. Det kan bety at du får nokre gode råd, eller kan gi nokon, dersom ladevennen din ikkje har lese denne saka.

Ein funfact du kan dra opp, er at Tesla i Trondheim er geografisk sett i bydelen «Lade» – kor morosamt er ikkje det?

Ingenting varmar så godt som ein god samtale – bortsett frå at det ikkje hjelper nemneverdig på batteriet.