Folk strøymer til Vatikanet for å ta farvel

Pave Frans er død, 88 år gamal.

Det kunngjorde Vatikanet måndag føremiddag.

Allereie få minutt etter at dødsfallet vart kjent, byrja det å strøyma inn med kondolansar frå heile verda.

– Pavens død er verkeleg trist. Han var ein stor mann og ein hyrde.

Det seier den italienske statsministeren Giorgia Meloni i ei utsegn, ifølge Reuters.

– Eg hadde det privilegium å oppleva venskapen hans og få råd frå han, som aldri stoppa, sjølv i vanskelege tider, seier Meloni vidare.

Du kan senda inn din kondolanse lenger ned i saka.

Kondolansar frå heile verda

Leiarar frå heile verda har kome med sine kondolansar etter at dødsfallet vart kjend.

– Pave Frans var ein viktig og klar stemme for sosial rettferd og menneskeleg verdigheit, seier statsminister Jonas Gahr Støre (Ap) til VG.

Spania erklærer tre landesorg i tre dagar, skriv nyheitsbyrået AFP.

I Paris vert Eiffeltårnet mørklagt måndag kveld, opplyser lokale styresmakter.

Klokkene i Notre Dame-katedralen i Paris har òg ringt 88 gonger for å heidra paven og dei 88 åra han levde. Det skriv AFP.

Minnemesse

Utanfor St. Olavs katolske kyrkje i Oslo er flagget firt til halv stong måndag føremiddag.

På føremiddagen går det føre seg ei messe. I byrjinga av messa informerte presten dei frammøtte om at paven var død, før dei bad for han.

– Det han ikkje hadde til felles med sine forgjengarar, var at han var impulsiv – på ein god måte.

Det seier biskop Bernt Eidsvig til NRK.

Òg i St. Svithun kyrkje i Stavanger var det minnemesse for paven, der rundt 50 menneske samla seg.

Inne i kyrkja var det heilt stille mellom salmane, og det er tydeleg at dødsfallet pregar messa.

– Det har vore ei ære å gjennomføra denne messa i stille, seier pater Pål Bratbak.

Kevin Dawid Zawadzki (17) og Erica Andreassen Øverlie (17) seier dei var klare for ei glad påskemesse.

– Men så vart det ei veldig trist ei, seier Zawadzki, og får støtte frå Øverlie som skildrar paven som svært populær og med fleire gode meiningar.

Ulstein: – Eit førebilete

Dag Inge Ulstein, partileiar i Kristeleg Folkeparti, seier i ei fråsegn at han tek imot beskjeden med sorg og at paven har vore eit førebilete for han.

– Ein av våre tids største hyrdar for fred, håp og forsoning. Pave Frans viste ein eineståande omsorg for dei fattige. Han utfordra makta, løfta dei sårbare og talte for fred i ei uroleg tid.

Ulstein nominerte i år pave Frans til Nobels fredspris for fjerde gong.

Den norske kyrkja omtalar pave Frans som ein usedvanleg kyrkjeleiar med stort mot.

– Det er eit enormt tap for heile verda at hans røyst er stilna, skriv preses Olav Fykse Tveit i ei utsegn.

– Overraskande

Vebjørn Selbekk, redaktør i den kristne avisa Dagen, omtalar dødsfallet som svært overraskande.

Paven vinka seinast sundag til dei frammøtte på Petersplassen i Vatikanet.

– Det var ikkje mange orda han kom med, men det så ikkje ut som ein mann som skulle gå bort så kort tid etterpå, seier han til NRK.

– Det er ein slags symbolikk at overhovudet for den største kristne kyrkja i verda går bort midt i påska, kommenterer han.