Frosta-saka: Arne Bye ankar dommen

Arne Bye blei for halvannan veke sidan dømt til 21 år i fengsel av Trøndelag tingrett.

Bye anka ikkje på staden, men valde å ta omtenkingstid. Måndag stadfestar Bye sin forsvarar, Frode Wisth, korleis Bye stiller seg til dommen.

– Det blir anke, så får vi kome tilbake til omfanget seinare, seier Wisth.

Forsvararen kan enno ikkje seie kva i dommen Arne Bye ankar.

Dei vil no utforme eit støtteskriv til anken der dei vil gjere greie for kva delar av dommen dei vil anke til lagmannsretten.

Heller ikkje grunnen til at Bye ankar dommen vil Wisth seie noko meir om.

– Det er vel at han ikkje er fornøgd med dommen, noko meir kan eg ikkje seie no, fortel Wisth til NRK.

Dømt for 70 valdtekter

Tingretten fann Bye skyldig i 70 valdtekter og 82 tilfelle av å misbruke sin stilling for å oppnå seksuell omgang.

Det skjedde etter ei over tre månader lang rettssak.

Tiltalen omfatta totalt 94 av Bye sine tidlegare pasientar.

– Ved fastsetting av samla straff legg retten vekt på at heilskapen og omfanget av tiltalte sine handlingar inneber at saka er svært alvorleg, sa tingrettsdommar Espen Haug da han las opp dommen.

I tillegg til fengselsstraff, blei Bye også frådømt retten til å praktisere som lege.

Ingunn Kjelstad er bistandsadvokat for fleire av dei fornærma kvinnene. Ho ønsker ikkje å kommentere at Bye ankar dommen.

– Vi veit ikkje enno kva det er han ankar over, så eg ønsker ikkje å seie så mykje om dette enno, seier Kjelstad.

Erkjente delvis straffskuld under rettssaka

Under rettssaka erkjente Bye å ha valdtatt 21 av dei fornærma kvinnene og 44 tilfelle av misbruk av stilling.

I dei andre tilfella erkjente han ikkje å ha gjort noko straffbart.

Påtalemakta la ned påstand om at Bye måtte bli dømt til 21 år i fengsel.

Bye sine forsvararar argumenterte for at riktig straff i saka ville vere mellom 17 og 18 år.

Nokre dagar etter at dom i saka fell blei det klart at Bye har fått ny forsvarar.