Haaland med scoring, sløseri og skade: – Utrivelege bilete

Ti minuttar ut i andre omgang var det nok fleire som haldt pusten. I duell med Lewis Cook datt Bournemouth-spelaren over foten til Erling Braut Haaland. Nordmannen viste tydeleg at han hadde ubehag i venstre ankel.

– Utrivelege bilete rett og slett, sa Viaplays fotballekspert Lars Tjærnås, medan Haaland fekk medisinsk hjelp på banen.

Nordmannen kom seg på beina igjen og forsøkte å spele vidare, men det tok ikkje mange sekunda før han skjønte at det ikkje gjekk meir og valde å bli bytta ut.

– Eg veit ikkje kor alvorleg det er. Me får sjå, seier Manchester City-manager Pep Guardiola etter kampen.

Haaland-bommar

Etter dryge ti minuttar av FA-cupoppgjeret mot Bournemouth var spelt fekk dei lyseblå straffespark. Haaland fekk ansvar, men forsøket til venstre for keeper var laust og dårleg plassert og blei enkelt å halde for Kepa Arrizabalaga i Bournemouth-buret.

– Det er ein for dårleg straffe, seier Viaplays fotballekspert Lars Tjærnås.

Det er den tredje bommen av sju straffespark for klubben denne sesongen.

Nokre minuttar seinare kom nordmannen aleine med keeper, men frå skrått hald gjekk forsøket over mål.

– To gigantmissar av Haaland, seier fotballkommentator Eivind Bisgaard Sundet i Viaplay.

I motsett ende var heimelaget effektive. Ein innsvingar enda hos Justin Kluivert på bakre stolpe som spelar ballen inn igjen framfor mål. På målstreken kastar Evanilson seg inn og set inn leiinga.

Snudde kampen

Før skaden sette Erling Braut Haaland inn utlikninga. Det var hans 30. scoring for Manchester City denne sesongen.

– Eit strålande Manchester City-angrep, samanfatta Lars Tjærnås.

Nico O'Reilly (20) blei bytta inn til pause og leverte ein flott pasning inn framfor mål, som Haaland enkelt kunne skli i mål.

Då Haaland gjekk av banen var erstattaren Omar Marmoush. To og eit halvt minutt seinare var egyptaren på målscorar-lista. Og nok ein gong var O'Reilly servitør.

– Han var utruleg. Energien han gav oss forandra kampen fullstendig, seier Manchester City-spelar Bernardo Silva på Viaplays sending om ungguten som fekk prisen som banens beste spelar.

Manchester City er med det klare for semifinale i FA-cupen. Der møter dei Nottingham Forest. I det andre oppgjeret skal Aston Villa spele mot Crystal Palace.