Kjærasten reagerte på Bergs 15-årsplan: – Ho var ikkje så fornøgd

Bodø/Glimt blei for små for Tottenham i semifinalen av Europaligaen torsdag. Kvile etter nederlaget kan dei likevel ikkje. Måndag speler dei kamp igjen, borte mot Aalesund i tredje runde av cupen.

Utanom to vekers juleferie har suksessen ført til at Glimt har spelt obligatoriske kampar på løpande band sidan 1. april 2024. Måndag ventar Aalesund i cupen.

Seriespelet i Europa, der Glimt allerede er sikra plass, strekker seg fram til januar 2026.

Det betyr at Glimt da vil gå 22 månader på rad med obligatoriske kampar. Minst.

– Det stiller ekstreme krav. Me bør få oss nokre pausar innimellom, seier Glimt-stoppar Jostein Gundersen til NRK.

– Me har kanskje Europas mest ekstreme kampprogram dei siste åra, med tanke på at me aldri har ordentleg pause. Det set både fysiske og mentale krav til oss, legg Gundersen til.

Han vil uansett ikke klage.

– Det er jo veldig artig, men sesongen stoppar aldri. Den går over 365 dagar i året, seier Gundersen.

Før serieopninga mot Fredrikstad i 2024 hadde dei fått fem veker fri etter å ha ryke ut av Serieligaen mot Ajax.

Sidan den gong har det gått i eit bankande køyr.

– Sesongane våre i Eliteserien og Europa overlappar kvarandre, så me får aldri den verkelege pausen andre norske lag får, men samtidig får me spele mykje meir fotball på høgare nivå, så eg vil sjå det på den måten at me får matche oss mot tøffare motstand gjennom heile året, seier Glimt-kaptein Patrick Berg.

Sjølv om kampbelastninga er stor, er ikkje 27 år gamle Patrick Berg nemneverdig bekymra på eigne vegne.

– Sjølv om eg begynner å bli litt eldre, så kjenner eg meg framleis som ein 22-åring. Foreløpig går det veldig fint, seier han.

– Vil halde på i 15 år til

– Saknar du meir tid til ferie med familien når det går i eitt køyr?

– Nei, eg er ein litt kjedeleg og grå type, så eg liker ikkje ferie. Eg er mest glad i kvardagar. For min del så vil eg ha så lite fri som mogleg og berre spele og kose med fotballen. Det har fungert bra for min del, seier han.

Og røper noko som truleg vil glede dei fleste Glimt-supporterar:

– Eg har jo sagt heime at eg har eit mål om å halde på i 15 år til, så får vi sjå.

– Kva sa frua til det?

– Ho var ikkje så fornøgd, og ser ikkje for seg 15 år til med dette livet. Det veit eg ikkje om ho er heilt klar for, seier småbarnspappaen med eit smil til NRK.

Saknar ikkje ferie

Dei gode resultata i Europa og ligatittelen frå førre sesong gjer at gultrøyene er sikra å kome seg til Europaligaen igjen til hausten. Dersom dei vinn playoff-oppgjeret tar dei seg til Meisterligaen.

– Det har vore lenge utan ferie, og lengre skal det bli. Får berre ta på arbeidshanskane og kome seg på jobb igjen, seier Håkon Evjen til NRK med eit smil.

Berg fortel at kampbelastning og manglande ferie ikkje har tore på enno, men han erkjenner at det kan få uante konsekvensar på sikt, spesielt med tanke på at det har blitt enda fleire kampar å spele i dei europeiske turneringane.

– Dei største klubbane har også snakka om dette. Det er vanskeleg å seie no når det har halde på så kort. Eg vil tru me ikkje vil sjå før om fem-sju år før ein ser langtidseffektane av det, seier Berg.

Erkjenner at den norske modellen gir utfordringar

På grunn av utfordrande klima på vinterstid startar den norske fotballsesongen på våren og blir avslutta på hausten. Det er motsett frå dei fleste andre ligaer i Europa.

– Den norske sesongen gir nokre ekstra utfordringar med tanke på kamptettleik fordi det blir spelt fotball på kontinentet i ein periode me normalt har fri, skriv direktør i konkurranseavdelinga i Noregs Fotballforbund, Nils Fisketjønn til NRK og legg til:

– Med dei rammefaktorane me har, så må me forsøke å spreie kampane over eit lengre tidsrom og strekke sesongen i begge endar innanfor kva som er forsvarleg reint klimatisk.