Klar melding: No må du ha på nok varme

– Det viktigaste er å førebyggje. Halde det varmt, og ikkje spare på straumen.

Røyrleggar Kenneth Fagerlid i Førde veit kva han snakkar om. No er han nedlest i arbeid på grunn av frosne røyr.

NRK har kontakta dei største forsikringsselskapa for å høyre kor mykje varme folk bør ha på.

Svaret er: Minst 10 grader.

Dette gjeld hovudsakleg rom kor det går vassrøyr – og særleg rom med røyr i ytterveggane.

Auke i skademeldingar

Førebels er det ingen flaum av skademeldingar til forsikringsselskapa.

For Gjensidige har det vore rundt 50–60 meldingar dei siste to vekene.

– Men det går relativt bratt oppover no, seier Bjarne Aani Rysstad i Gjensidige.

I sprengkulda i januar 2024 var det meir enn 7600 skademeldingar på grunn av frosne røyr. Det er 10 gongar meir enn januar i 2025.

Forsikringsselskapet Frende trur talet på skademeldingar vil auke kraftig til helga.

– Då vil mange dra til hytta og sjekke korleis det står til der, ifølge Marius Solberg Anfinsen i Frende.

Og apropos hytta: Her gjeld det å skru av hovudkrana når ein reiser vekk. Er det ikkje på stell, risikerer du å få att mindre pengar på forsikringa ved skade.

Ikkje bruk gassbrennar

Viss røyra først er frosne, gjeld det å tine dei opp langsamt. Elles kan det gå frå vondt til verre. Her gjeld det å høyre med røyrleggaren.

Ein metode som ikkje er for amatørar, er å sette straum på røyret, ifølge Fagerlid i Førde.

Forsikringsselskapa har erfart fleire husbrannar etter uforsiktig opptining av røyr.

– Da har det ofte vore bruk av open flamme, ein gassbrennar til dømes, inni veggen. Det kan få fatale konsekvensar, seier Sigmund Clementz i If.

Mange blir først klar over skadar når mildvêret kjem.

Det gjeld mellom røyret som går til utekrana (som du burde ha huska å stenge av i haust).

– Når frosne og sprokne røyr tinar, kjem all elendigheita til syne, seier Rysstad i Gjensidige.

Så sjølv om det er trasig å bruke pengar på dyre straumrekningar, er det enda verre med sprokne vassrøyr.

Å skru av varmen no er å «spare på skillingen og la dalaren gå», som det heiter.

Så husk: Sett varmen på minst 10 grader.