Klubben har venta i 20 år: – No er det på tide med handling!

Medan andre idrettslag har jubla for midlar til nye anlegg, har eitt av Rogalands største idrettslag venta og venta. – Vi er i ein pressa situasjon, seier dagleg leiar.

Slik ser dagens anleggssituasjon ut på Madla. Foto: Fredrik Refvem

– Vi har jobba med dette i lang tid, men ikkje kome vidare. Vi er i ein pressa situasjon og har vore det i lang tid. Det er lite som skjer, og slik har det vore i 20 år, seier Morten Tønnessen, dagleg leiar i Madla IL.

Rogalands største breiddeklubb i fotball har sprengt banekapasitet. Med 100 lag og nesten 1300 medlemmer, er det litt av ein kabal som skal leggast når treningstider skal bli fordelt.