Kor kjem narkotikaen i USA frå?

Verdas auge er retta mot Venezuela og USA.

Det etter at USA angreip fleire mål i Venezuela, og tok president Nicolás Maduro og kona Cilia Flores til fange.

USA hevdar at Maduro, kona og sonen har deltatt i omfattande narkotikaverksemd.

Dei peikar på det som ei hovudårsak for angrepet.

Men kva rolle speler eigentleg Venezuela i den latinamerikanske narkotikahandelen?

Transittland for kokain

– Venezuela er først og fremst eit transittland, slår Latin-Amerika-forskar Benedicte Bull fast.

Det vil seie at narkotika blir frakta gjennom landet. Det blir i liten grad produsert narkotika i Venezuela, ifølgje Bull.

Bull peikar på at både småfly, småbåtar og båthamner blir brukte for å frakte narkotikaen gjennom landet.

Av ulovlege stoff er det i hovudsak kokain, fentanyl, marihuana og heroin som blir smugla inn i USA frå Latin-Amerika.

– Politisk er fokuset mest på fentanyl og kokain, seier statsvitar Hilmar Mjelde.

Kokainen kjem frå Colombia, Peru og Bolivia, medan fentanyl kjem i hovudsak frå Mexico, ifølgje Mjelde.

– Fentanylet blir laga i Mexico med ingrediensar frå Kina, og blir smugla gjennom Mexico, legg han til.

Narkotikaen blir i hovudsak smugla inn i USA til lands over grensa frå Mexico, men frakta nordover frå produsentlanda involverer også båtar og fly, ifølgje Mjelde.

– Venezuela speler ei viss rolle som transittland for kokainen, men ikkje for fentanylet. Landet er ikkje eit produsentland for nokon av stoffa, forklarar statsvitaren.

Bull peikar på Ecuador som ein viktig eksportør.

– Mykje av kokainen blir sendt ut frå Ecuador, men kjem frå nabolanda, seier ho.

– Langvarig konfliktfylt forhold

Sjølv om Venezuela ikkje er ein stor eksportør av narkotika, held USA fast på at narkotikaverksemda er blant årsakene til angrepet.

Men Trump har også retta skuldingar mot fleire andre land i samband med narkotikaproduksjon, skriv BBC.

• Han har skulda kinesiske selskap for å selje kjemiske stoff til kriminelle gjengar.
• Han har skulda både Canada og Mexico for å «tillate store mengder folk og fentanyl» bli frakta inn i USA.

Men tal frå amerikanske grensemyndigheiter sjølv viser at berre om lag 0,6 prosent av fentanylbeslag i USA i 2025 blei tatt på den kanadiske grensa.

– I Trump sitt hovud er alskens problem i Latin-Amerika sausa saman, seier Mjelde.

– Trump har snakka om illegal innvandring til USA, narkotika, terrorisme og olje som motiva for å angripe Venezuela, legg statsvitaren til.

Trump har også antyda at han kan komme til å angripe Colombia og Mexico.

– Colombia er også svært sjukt, styrt av ein mann som likar å lage kokain og selje det til USA. Han kjem ikkje til å gjere det særleg lenge, sa Trump måndag.

Det er likevel lite truleg med eit liknande angrep mot Colombia og Mexico, ifølgje Bull.

– Eg trur ikkje det kjem til å bli den type intervensjon som vi har sett i Venezuela. Der var det veldig mange faktorar som samanfall. Det har vore eit langvarig konfliktfylt forhold mellom landa, seier Bull.

– Men det kan komme enkeltangrep. Han har lenge trua med å bombe kartell i Mexico og Colombia, legg ho til.

Maduro i retten

– Den illegitime diktatoren Maduro var narkotikabaronen i eit omfattande kriminelt nettverk, ansvarlege for smugling av enorme mengder ulovlege narkotiske stoff inn i USA.

Det sa USA sin president Donald Trump under ein pressekonferanse 3. januar.

I USA er Maduro, kona og sonen tiltalt for «narkoterrorisme», og for å ha hatt ulovlege våpen i sitt eige.

Ifølgje tiltalen har leiarar i Venezuela i ei årrekke misbrukt sine stillingar for å importere store mengder kokain til USA.

Maduro nektar straffskuld og i retten sa han fleire gonger at han er uskuldig.

– Eg er ein krigsfange, sa Maduro ifølge New York Times, og held fast på at han er bortført av USA.

– Akkurat kva Maduro har gjort har vi ikkje noko informasjon om utover det som ligg i tiltalen, seier Bull.

Følg utviklinga i Venezuela her:

Interessert i det som skjer i verda? Høyr podkasten til utanriksredaksjonen her: