Køyrde i grøfta – hadde 3,23 i promille

Det var på sjølvaste valentinsdagen i fjor at naudetatane rykka ut til ei trafikkulukke på E39 i Rogaland.

Ein lastebil hadde hamna utfor vegen ved Ognøy i Bokn. Til politiet fortalde fleire vitne om sjanglande køyring før trekkvogna til slutt reiv ned autovern og hamna i grøfta.

Bak rattet sat ei kvinne i 30-åra. 

Denne dagen var ho alt anna enn skikka til å køyre tungt gods på ein trafikkert europaveg.

Ekstrem promille

Ein blodprøve tatt av kvinna viste ein promille på skyhøge 3,23. 

Eit promillenivå på over 3 blir rekna som direkte livsfarleg. Pustesenteret i hjernen sluttar å fungere og ein kan bli medvitslaus og dø.

KØ: Lastebilen stod i vegen for all trafikk på E39 etter fyllekøyringa. Foto: Politiet

Sør-Rogaland tingrett er tydelege i sin karakteristikk av promillenivået.

«Dette er ein ekstremt høg promille», skriv tingrettsdommaren. Ho legg vidare vekt på fleire svært skjerpande forhold ved fyllekøyringa.

Det viste seg nemleg at den kvinnelege lastebilsjåføren hadde køyrt ruspåverka heilt frå Bergen. 

På ein fredags ettermiddag som dette er det mykje trafikk på E39, hovudvegen mellom Bergen og Stavanger.

– Uforsvarleg

Frå start til ulukkespunktet i Bokn er det 150 kilometer. 

Promillemålinga stammar frå blodprøve tatt to timar etter trafikkuhellet.

Kvinna heldt fram med å drikke alkohol etter utforkøyringa, så TV 2 er ikkje kjent med kor høg promillen var på slutten av køyringa. 

Det blei tatt blåseprøve før politiet tok ho med på legevakta for ein meir sikker blodprøve.

– Det må også vektleggast at det blei observert at trekkvogna sikta køyrde sjangla i vegbana før den hamna utfor vegen. Både den uforsvarlege køyringa og det faktum at sikta køyrde ei trekkvogn med tilhengar inneber eit ytterlegare farepotensial ved køyringa, skriv tingretten.

Likevel slepp kvinna fengsel.

I tilståingsdommen blir ho dømd til 45 dagar fengsel på vilkår, med ei prøvetid på to år. 

Det betyr at om kvinna gjer nye lovbrot, så må ho sona i fengsel.

Tatt med skyhøy promille – skulle kjøpe vodka

Skal få behandling

Det var politiet som bad om at kvinna slepp fengselsstraff om ho samtykker til å følgje eit program for ruspåverka køyring.

Til retten fortalde kvinna at ho var svært motivert for dette og fortalde også opent om sitt alkoholproblem.

– Retten har vurdert om ein slik reaksjon på vilkår vil vera urimeleg opp mot saka sitt alvor. Særleg når det gjeld den svært høge promillen og skadepotensialet, skriv tingretten.

– Men retten meiner likevel at denne reaksjonen, med eit vilkår om å følgja eit program, vil vera den reaksjonen som er best eigna til å førebygge at sikta gjer tilsvarande lovbrot igjen.

Kvinna i 30-åra må derimot betala ei bot på 65.000 kroner og må klare seg utan førarkort i fire år.