Kravet om vern av dyrka jord er alvor no, Randaberg!

Bildet viser Ingve Lerang, gruppeleiar i Venstre i Randaberg. Foto: Fredrik Refvem

DEBATT: Randaberg kommunestyre utfordrar regjeringa sitt direktiv om å ta vare på matjorda.

Stavanger Aftenblad har nyleg hatt to oppslag om at seks medlemmer av Randaberg kommunestyre nå utfordrar fleirtalet på jordvern. Fleirtalsvedtaket i sak 14/25 i dette høgaste kommunale organet ignorerer Landbruks- og matdepartementet og Statsforvaltaren i Rogaland sine klare krav om forsterka jordvern.

Departementet seier i skriv av 24. januar i år klart frå om at kravet om vern av dyrka jord nå er meint på alvor. Dyrka jord er grunnlag for matproduksjon, sjølve kjernen i vår totalberedskap. Og i desse tider er totalberedskapen kome høgt på dagsorden att.

På Landbrukskonferansen i Stavanger den 17. mars var statsforvaltar Bent Høie krystallklar på dette. Han er statens representant i fylket og skal sjå til at statleg politikk blir følgt opp.

Høie var klar på dette:

Nå er jordvern alvor! Kommunane må gjennomføra planvask for å føra tilbake areal til landbruk som i eldre planar er tenkt til utbygging. Kommunane vil ikkje ha økonomisk ansvar for slik tilbakeføring så lenge utbygging ikkje er starta.

Det er altså ikkje sagt noko om at utbyggjarane sine interesser skal vega tyngre enn omsynet til vern av jorda. Tvert om må me rekna med at dei selskapa som kjøper seg opsjonar, eller løyser inn areal, er så profesjonelle at dei veit det er risiko med slikt.

I ei av sakene i Aftenbladet seier tidlegare ordførar Bjørn Kahrs at partiet hans har sjekka ut med juridisk kompetanse at kommunen kan koma i erstatningsansvar viss tidlegare planar blir gjorde om. Kahrs kan kontakta den advokaten som kanskje har størst kompetanse på dette området, Nicolai Winge i Oslo, eller stola på regjeringa og Statsforvaltaren. Når tidene endrar seg og matvareberedskapen blir truga, kan planar endrast utan erstatningsansvar.

Det blir ikkje lettare for dei som er politikarar om 30 eller 50 år å seia at nå er Randaberg ferdig utbygd. Men det er lettare for dei som styrer i dag å koma frå tøffe vedtak ved å skyva utfordringane føre seg.