Maria og Rasmus sa «ja»: Gifta seg på drop-in på isen

– Eg såg innlegget på Facebook på torsdagen og så tenkte eg, kvifor ikkje?

Maria Christine Hedström hadde i grunn ingen planar om å gifte seg med sambuaren Rasmus Olof Anders Ahnel med det første.

– Men så ringde eg til han og spurde: «Har du lyst å gifte deg med meg på laurdag? Eg har prest, eit tidspunkt og så er der på isen», fortel Maria Christine Hedström før vigsla.

Og vipps blei dei eitt av åtte par som trassa den bitande kulden og valde å seie ja til kjærleiken på valentinsdagen på drop-in-bryllaup. Og det på islagde Langen i Nordre Follo, med skøyter på beina.

– Eg hatar å stå på skøyter så eg er berre glad for at eg står på beina, seier ein litt nervøs Rasmus.

– Så glad er han i meg, legg Maria til med eit smil.

Kjærleik i heile landet

419 par nytta valentinsdagen til drop-in-bryllaup i 125 kyrkjer rundt om i landet, viser ei førebels oppteljing frå Den norske kyrkja. Det er ein kraftig oppgang frå i fjor. Då var det 277 slike bryllaup.

I Nidarosdomen i Trondheim gifta heile 27 par seg. I Mariakirken i Bergen gifta elleve par seg.

Espen Andreas Hasle er prost i Nordre Follo og glad for at mange vel drop-in. Sjølv om bryllaupa ofte blir planlagde på kort varsel, synest han det et like stort kvar gong nokon seier ja til kjærleiken.

– Eg opplever ikkje at folk giftar seg på impuls. Tvert i mot så er det mange som har hatt lyst å gifte seg lenge, men ikkje har orka det svære styret med diger fest, seier han.

Det nygifta paret på Follo var godt nøgde etter den noko alternative vigsla.

– Det var fantastisk fint og veldig romantisk, seier den no nygifta Maria.

– Ja det er fantastisk. Alt gjekk så fort, seier ektemannen hennar, Rasmus.