Med hormontablettar vart livet mitt betre

DEBATT: Med hormontablettar vart livet betre, men det handlar om meir enn medisinar. Me må snakka meir om kvinnehelse når me snakkar om sjukefråværet. Det handlar også om arbeidsliv, leiing og kultur.

Difor er det vanskeleg å forstå at kvinnehelse framleis er nesten fråverande når vi diskuterer sjukefråvær., skriv Anne Kristin Bruns. Her er ho saman med ektemannen Steve Bruns. Foto: Jan Inge Haga

Hjernetåke, hukommelsestap, sveittetokter, hjartebank, irritabilitet og søvnløyse. Eg trudde eg var alvorleg sjuk – at eg hadde hjarteproblem eller begynnande demens. I realiteten var eg i overgangsalderen.

Det tok fleire år før eg fekk hjelp. Med hormonbehandling – og kunnskap – vart livet betre. Men det viktigaste var å bli trudd.

Difor er det vanskeleg å forstå at kvinnehelse framleis er nesten fråverande når vi diskuterer sjukefråvær.

I Stavanger Aftenblad 23. april vart Energiseminaret 2026 omtalt: Vi må få ned sjukefråværet, vi treng fleire i arbeid. Eg er einig. Men kvinnehelse var ikkje tema.

Det er ein alvorleg mangel.

Kvinner går gjennom livsfasar som påverkar helse og arbeid: pubertet, menstruasjon, svangerskap og overgangsalder. Likevel er dette framleis prega av stille, skam og manglande kunnskap.

Resultatet? Kvinner har høgare sjukefråvær. Mange blir ikkje tekne på alvor. Og éin av fem kvinner mellom 44 og 60 år står utanfor arbeidslivet.

Dette er ikkje eit individuelt problem. Det er dårleg politikk.

Samtidig veit vi kva som verkar.

Mellom anna har Bergen og Balsfjord kommune har begynt å jobbe systematisk med kvinnehelse i arbeidslivet. Dei har forankra arbeidet i leiinga og innført konkrete tiltak. Resultatet er lågare sjukefråvær og betre arbeidsmiljø.

I Partille kommune i Sverige har dei gått endå tydelegare til verks. Der er kvinnehelse ein del av arbeidsgivarpolitikken – og dei får fleire kvinner til å stå lenger i jobb.

Kvifor gjer vi ikkje det same her?

For smale diskusjonar

KrF har dei siste månadene løfta kvinnehelse som tema – både i formannskapet i Stavanger kommune i arbeidet med sjukefråvær, og inn i planen for helse og inkluderande samfunn i Rogaland fylkeskommune. På Stortinget har fleire parti no løfta inn behovet for hormonbehandling på blå resept. Det er viktige steg, men det må følgjast opp med konkret handling i heile arbeidslivet.

I staden ser vi at debatten ofte snevrar seg inn. I eit lesarinnlegg i Stavanger Aftenblad blir det stilt spørsmål ved om kvinner skal få betre tilgang til hormonbehandling. Den diskusjonen er viktig – men han blir for smal åleine.

For dette handlar om meir enn behandling. Det handlar om arbeidsliv, leiing og kultur.

KrF har vore opptatt av heile løpet – særleg frå svangerskap til barseltid. Vi vil styrke jordmortenesta, sikre trygge fødetilbod i heile landet og gi betre oppfølging etter fødsel. Samtidig vil vi gi familiane meir tid og større fridom gjennom fleksibel permisjon. Dette handlar om tryggleik, valfridom – og om å ta kvinnehelse på alvor. Men vi har også sett overgangsalderplager på dagsordenen. Vi treng eit arbeidsliv med plass til heile kvinna – i alle livsfasar.

Difor utfordrar vi både arbeidsgivarar og politiske styresmakter:

Gjer kvinnehelse til ein del av arbeidet med sjukefråvær.
Sørg for kompetanse hos leiarar.
Legg til rette med enkle, konkrete tiltak: fleksibel arbeidstid, pausar, temperatur og arbeidsklede.

Smart politikk

Dette er ikkje særbehandling. Det er smart politikk.

For vi veit kva alternativet er: at kvinner fell ut av arbeidslivet, at kompetanse går tapt, og at kostnadene aukar – både for den enkelte og for samfunnet.

Vi må slutte å snakke om sjukefråvær utan å snakke om kvinnehelse.

Vi må gå frå stille til openheit.
Frå individfokus til systemansvar.
Frå ord til handling.

Halvparten av oss fortener betre.
Og samfunnet har ikkje råd til å la vere.