Nokre av dei eldste trea i verda trua av skogbrannar i Argentina

Nabolanda Argentina og Chile har i snart to veker vore herja av enorme skogbrannar.

I helga førte enorme brannar rundt byen Concepción i Chile til at minst 20 personar mista livet. Det opplyser sikkerheitsminister Luis Cordero, skriv Reuters.

Over 200 kvadratkilometer skog er tatt av flammane. Den største brannen rundt Concepción har svidd av rundt 140 km².

Eit større fengsel i området er no trua av flammane.

Klimaendringar

Brannane kjem av ein kombinasjon av vind, tørke og ei pågåande hetebølgje. Dei neste dagane er det varsla temperaturar opp mot 38 grader i området som brenn.

Chile har dei siste åra opplevd fleire tragediar knytte til skogbrannar.

For to år sidan døydde over 100 menneske då brannar herja feriebyen Viña del Mar.

Året før, i 2023, døydde over 20 menneske i brannar i det same området som no er råka av brann.

Brannane er ikkje tilfeldige, men eit direkte resultat av klimaendringar, skriv Verdsbanken.

Verste tørke på over 60 år

På den argentinske sida av Andesfjella er over 150 km² tatt av flammane.

Den største av brannane i området har så langt svidd av over 120 km², medan ein annan i nærleiken har brunne rundt 30 km².

Delar av landet opplever den verste tørken på over 60 år. Brannen har herja i snart to veker, skriv argentinske Clarín.

Verdsbanken skriv at tørke, hetebølgjer og skogbrannar skaper ein vond sirkel som truar økosystem og inntektene til folk.

Enorme tre

Eit område med sjeldne patagoniasypress er trua av dei store skogbrannane som herjar i Argentina, skriv Nasa.

Patagoniasypressen kan bli opptil 60 meter høg og kan truleg bli meir enn 3600 år gammal. Det gjer dei til nokre av dei eldste trea i verda.

Dei veks i Andesfjella i Argentina og Chile. Ifølge Unesco er rundt 36 prosent av den argentinske bestanden i nasjonalparken Los Alerces, området som no blir herja av brannar.

Har lova ut påskjønning

Korleis brannane har starta er ikkje klart.

I Argentina seier provinsguvernør Ignacio Torres i Chubut til AP at det er teikn som tyder på at ein av brannane er påtend.

Argentinas visepresident Victoria Villarruel har tatt til orde for strengare straffer for dei som tenner på, skriv Clarín.

Politico skriv at provinsguvernør Ignacio Torres har lova ut ei påskjøning på 50 millionar peso – rundt 350.000 kroner – for opplysningar som fører til at nokon blir pågripne.