Ny sommar med buss for tog på Austlandet

Fleire har blitt vane med at det blir jobba på togstrekningar i Noreg om sommaren.

Også denne sommaren skal Bane Nor jobbe på sporet og med fornying på fleire strekningar.

– Det er eit stort og omfattande arbeid som gjer at fleire kan nytte toget i tida framover, seier Victor Hansen, direktør for kunde- og trafikkinformasjon i Bane Nor.

– Nyttar moglegheita

Særleg det sentrale austlandsområdet blir ramma. 10 strekningar blir stengde og passasjerar må ta buss for tog. Då har pendlarane ferie.

– Då nyttar vi moglegheita, når færrast mogleg er ute og reiser, til å få gjort nødvendig vedlikehaldsarbeid og oppgraderingar, som er nødvendig for å få ein robust jernbane.

Ifølge Hansen reduserer vedlikehaldet risikoen for akutte feil, og oppgraderingane gjer at fleire passasjerar kan reise raskt, trygt og komfortabelt.

Meir trafikk krev meir vedlikehald

Auka trafikk slit på jernbanen, sidan fleire tar tog, ifølge Hansen.

Romeriksporten på Gardermobanen blir stengt lengst. Frå laurdag 27. juni til og med søndag 9. august går det ikkje tog mellom Oslo S og Lillestrøm.

– Romeriksporten har hatt stor trafikk og nærmar seg 30 år. Så behovet for å oppgradere han med nye skjener og sviller, er nå stort.

På Vestfoldbanen frå Drammen til Porsgrunn blir det stengt når delar av strekninga får nye skjener.

På det nye dobbeltsporet skal det nye signalsystemet ERTMS testast ut. I år blir ikkje Drammen stasjon ramma, slik som før.

Bane Nor jobbar ikkje på alle strekningar samtidig, og ikkje like lenge på dei. Sjå oversikta her:

Kan ta lengre tid

Hansen rår passasjerar til å ta høgde for at det kan ta lengre tid å reise med buss. Bussen kan også ha andre stoppestader enn toget.

– Planlegg reisa di i god tid. Sjå godt etter om du er ramma.

Han seier dei har tatt tilbakemeldingane på alvor om at dei må skilte og merke område godt der folk kan ta buss.

– Då bruker vi den konsistente gulfargen, så følg den når du skal oppsøke ditt område der du skal nytte buss for tog.

Skal halde tidsfristane

Det kan også vere greitt å vite at nokre arrangement i Oslo er venta å føre til ekstra mange reisande.

Bane Nor trekker fram Pride og Tons of Rock siste veka i juni, Karpe World 2.–4. juli og Norway Cup siste veka i juli.

– Korleis reagerer folk på at det ofte er buss for tog om sommaren?

– Vi forstår at det alltid er frustrerande å køyre buss for tog om sommaren. Men vi har blitt ganske flinke til å informere dei som skal ut og reise med toget i god tid. Så dei fleste veit no veldig godt kva vi skal gjere, kor vi skal jobbe og om det påverkar den planlagde reisa deira.

– Rekk de å bli ferdige innan tidsfristane de har sett?

– Det er veldig godt planlagt, så vi har stor tru på at vi skal klare å halde dei fristane som er sette.