Ønsker ikkje Statsforvaltaren fleire folk på øyane som ikkje er landfaste?

DEBATT: Har administrasjonen vanskar med det politisk fastsette busetjingsomsynet?

Skal me få vekst i folketalet på øyane, må det faktisk gå an å busetje seg her. Bildet viser Aubøsund på Sjernarøy. Foto: Egil Eriksson

Kommunedelsutvalet er opptatt av å vidareføre det viktige busetjingsomsynet som politikarane i Finnøy fekk inn i kommuneplanen i 2016. Dette er ein heimel som gjev kommunen høve til frådeling av bustader i landbruksområde dersom deling vil vareta omsynet til busetjing. Kvifor? Det er av nasjonal interesse å sikre og legge til rette for busetjing i heile landet.

Dette viktige omsynet har også fått ein eigen heimel i den viktige jordlova som skal sikre matproduksjon i heile landet. I Kommuneplanen for Stavanger er det fastsett busetjingsomsyn på dei ikkje-landfaste øyane i Finnøy kommunedel. Kva kriterium som gjeld i frådelingssaker, står utdjupa i kommuneplanen. I fjor haust vart busetjingsomsynet handsama i bystyret i Stavanger og vedteke vidareført med 64 mot 3 stemmer.