Rasar mot bykommunars «lokketilbod» til studentar: – Utilgiveleg handling

– Dersom Bodø kommune vedtar å prøve å lokke og lure ungdommen frå nabokommunane og andre stader i Nordland, så blir Bodø ein skikkeleg dårleg storebror.

Det seier stortingsrepresentant for Nordland, Siv Mossleth (Sp).

Sist veke foreslo kommunedirektør i Bodø, Kjell Hugvik å gi 6.000 kroner til studentar som melder flytting til byen.

Dette gjorde han etter at eit einstemmig bystyre i desember hadde vedteke å greie ut ei slik ordning.

Håpet er å lokke 500 studentar, noko som kan gi kommunen 13,8 millionar kroner ekstra å rutte med.

Kommunen får nemleg tilskot på 33.566 kroner per innbyggar.

Kommunedirektøren meiner at dette er eit målretta og økonomisk berekraftig tiltak som kan bidra med å styrke Bodø som universitetsby, og på same tid gi inntekter gjennom rammetilskotet, skriv Hugvik i oppfordringa.

Men fleire politikarar frå regionen er ikkje så fornøgd med forslaget.

Blant andre Mossleth, som sjølv er frå Saltdal kommune, og kallar det å snuskhandle studentar.

– Nabokommunane i Salten jobba knallhardt saman med Bodø for at det skulle bli eit universitet i Bodø.

Seier ho og utdjupar at kommunane hjelpte til med å finansiere stillingar som måtte til for å gjere den dåverande høgskolen om til eit universitet i 2011.

– Om takken for å få eit universitet til Bodø er å prøve å snuskhandle til seg studentar, så er det ei uvennleg og utilgiveleg handling som set eit skikkeleg bøddelstempel på Bodø.

Derfor ber ho politikarane i Bodø om ikkje å ta over unge vaksne i enda større grad enn naturleg tilflytting til ein universitetsby gjer.

Men kva tenker studentane sjølv om forslaget?

– Veldig positivt

– Det er noko vi har sett eit behov for, og som vi tenker det er veldig viktig å få. Både økonomisk for studentane, men også med tanke på den politiske tilhøyrselen. Det er noko med å ha innverknad og påverking der du bur hovudparten av tida di.

Det seier studentleiar ved Nord universitet, Hanna Mary Pettersen, som legg til at studentane faktisk har jobba i to år for å få til dette forslaget.

Ho meiner tiltaket er viktig for ein studentmasse som har det trongt økonomisk.

– 6000 kroner kan ha veldig mykje å seie for ein student.

Det kan brukast på mat, tenester, eller til og med husleige. Men det kjem an på om støtta kjem i form av pengar eller gåvekort. Det er ikkje avklart enno, ifølge Pettersen.

Dersom ordninga blir vedtatt, er Bodø i selskap med Levanger og Drammen som tilbyr 7.000 kroner til studentar som melder flytting til kommunen, mens Bergen tilbyr eit gåvekort på 2.000 kroner.

På kritikken frå kommunane rundt, seier ho at dei gjer det som dei meiner er best for studentane.

– Når ein har bebuarar i ein kommune, så må ein ha økonomien til å dekke dei som er i kommunen. Vi ønsker også at studentane skal bli i regionen og fortsette å jobbe her. Om ein får fleire studentar til Bodø, så vil jo regionen kunne dra nytte av det, seier studentleiaren.

– Etter ønske frå studentane

Det er ikkje første gong Bodø prøvar seg på eit slikt stønt.

I 2018 skulle studentane også få pengar mot at dei endra bustadadresse til Bodø. Men etter kjeft frå nabokommunane, blei det berre studentane utanfor fylkesgrensa som fekk.

Det likte studentane dårleg, og kalla det forskjellsbehandling.

Men ifølge kommunedirektøren i Bodø blei dette aldri gjennomført.

No prøvar altså Bodø kommune på dette igjen, etter ønske frå studentane.

– Vi har etter ønske frå studentane bede om å få lagt fram ei ordning som skal sikre god finansiering av viktige studenttilbod som for eksempel studentlege og rimelegare busstilbod, skriv ordførar Odd Emil Ingebrigtsen i ei melding til NRK.

På lik linje med studentane meiner han dette kan bidra til at dei får eit betre opphald i Bodø, og liknande ordningar er brukte av fleire andre kommunar i landet, skriv han.

Studentar kan sjølv velje om dei vil endre folkeregistrert adresse ved studiestart.

Verken Folkeregisteret eller Lånekassen krev flyttemelding, noko som bidrar til at mange held fram med å vere registrerte i heimkommunen sin, sjølv om dei bur fast i studiebyen.

– Det er etter mi meining rett at folk har bustadadresse i den kommunen dei faktisk har tilhaldsstaden sin. Vi stiller trass alt med kommunale tenester til dei som må finansierast.

Til kritikken retta frå Mossleth svarer Ingebrigtsen.

– Mossleth angrip eigentleg studentane som har jobba for dette i årevis.

– Vil svekke inntektene

Stortingsrepresentanten er ikkje den einaste som reagerer på forslaget. Nabokommunen Fauske er også sterkt kritisk.

– For å bevare god naboskap, og for å vere solidarisk med kommunane i Salten, så bør ikkje Bodø, som den store fylkeshovudstaden og allereie har fortrinn, dra ungdom til seg på denne måten. Det vil jo stort sett vere ungdom som er busett i nabokommunane rundt Bodø, seier ordførar i Fauske, Marlen Rendall Berg (Sp) til NRK.

I ei pressemelding skriv formannskapet at det er eit stort tal studentar frå Fauske som studerer ved universitetet.

– Med så mange studentar frå Fauske som studerer på Nord universitet, vil eit slikt grep av Bodø kommune svekke inntektene for Fauske kommune med fleire millionar kroner, står det i meldinga.

Dei meiner forslaget vil vere svært negativt for nabokommunane.

Det er ordførar i Steigen, Aase Refsnes (SV) einig i. Ho seier til Avisa Nordland at ho fryktar tiltaket vil tømme distrikta rundt Bodø.

Saka skal opp i formannskapsmøtet i Bodø kommune onsdag og bystyret 19. juni.