Refsar forbundet etter serieopninga: – Dei må sjå seg sjølve i spegelen

– Eg synest ikkje det gir oss ein liga på eit høgt nok nivå.

Det seier Vålerengas trenar Nils Lexerød om alderen på spelarane i Toppserien.

Bakgrunnen er at Vålerengas motstandar Kolbotn spelte med eit svært ungt lag i seriepremieren søndag.

Lexerød understrekar overfor NRK at dette er leiingskritikk og ikkje ein direkte kritikk av Toppserie-klubben Kolbotn.

For Meisterliga-klubben Vålerenga vann 6–0 mot eit lag med gjennomsnittsalder på 18,5 år og åtte tenåringar frå start.

– Eg tenker at det er ein gjeng med unge spelarar som gjer så godt dei kan, men som aldri skulle ha vore sett i ein situasjon der så mange unge skal spele samtidig i Toppserien, seier Lexerød.

Unge spelarar i ligaen

Den norske Toppserien er ein ligaene med lågast gjennomsnittsalder på spelarane. I ei undersøking frå CIES, ein organisasjon som driv med fotballforsking, blei 19 toppligaer analyserte.

Der var det berre to ligaer som hadde lågare snittalder på spelarane enn i Toppserien.

I første serierunde var gjennomsnittsalderen 22,7 år i Toppserien.

– No må leiarane i kvinnefotballen, både i NFF, i TFK og i klubbane, sjå seg sjølve i spegelen, seier Lexerød, og held fram:

– Dei må kome seg på jobb. Og så må dei bruke dei verkemidla dei har for å utvikle ligaen i retning av profesjonelle klubbar – slik at vi får gode nok spelartroppar til at vi kan ha ein jamn og god liga med etter kvart tolv lag, seier Lexerød.

Kolbotn har før denne sesongen signert fleire eldre spelarar med erfaring, men nokre av desse var utilgjengelege til serieopninga mot Vålerenga.

Trenar Arild Sundgot er mest opptatt av at eige lag skal få utvikling framfor gjennomsnittsladaren på serien.

– Det er veldig ungt, det er det. Tøff læring for jentene, men kjempelæring. Eg trur dei vil ta store steg i løpet av sesongen, så Kolbotn har ei lys framtid med desse jentene, seier Sundgot.

For tre veker sidan vedtok fotballtinget at Toppserien skal utvidast med to lag til neste sesong. Dermed blir serien utvida frå ti til tolv lag.

Forslaget blei vedtatt med 355 mot 11 stemmer.

Forslaget blei stemt gjennom i tråd med NFFs innstilling. Det blei også støtta av interesseorganisasjonen Toppfotball Kvinner, som er eigd av klubbane Toppserien og 1. divisjon.

Tar utfordringa

Den nytilsette leiaren i Toppfotball Kvinner, Marianne Solheim, anerkjenner at alderen på spelarane er ei utfordring.

– Det er ikkje positivt verken for ligaen eller kvinnefotballen at vi har lag med så låg gjennomsnittsalder. Det er det ikkje for spelarane heller.

Ho gir Vålerenga-trenaren rett i at det ikkje er positivt at klubbar stiller med tilnærma juniorlag.

– Eg trur ikkje vi skal late som at jobben er gjort, for det er mykje jobb som står igjen. Og det kan hende at vi må ta tak i nokre tema og oppgåver no som ein ikkje var klar for å ta tak i for fem–seks år sidan, seier Solheim og legg til:

– Eg er klar, eg, til å ta den oppfordringa.

Norges Fotballforbund opplyser til NRK at dei er på linje med Toppfotball Kvinner når det gjeld seriestrukturen i fotballen.

Som leiar for interesseorganisasjonen for norske toppklubbar er Solheim klar på at Toppserien må bli meir attraktiv.

– Eit anna aspekt er det som handlar om å avgrense spelarflukt, altså spelarar som forsvinn ut av Toppserien og inn i andre ligaer som evnar å tilby ein meir heilskapleg kvardag.

Frustrert

Ein av dei som ikkje fekk spesielt mykje ut av kampen var Vålerenga-spiss og målskårar Karina Sævik.

– Da eg var 15–16 år, så spelte eg vel i andredivisjon eller sat på benken i Avaldsnes. Eg spelte med folk som var betre enn meg, så det er litt annleis no.

Ho er usikker på korleis den nye seriestrukturen frå neste år vil påverke nivået på ligaen. Likevel er det eit håp i sikte.

– Forhåpentleg kjem jo kanskje Molde og Aalesund opp i Toppserien på sikt. Det er lag som har litt budsjett og pengar, seier Sævik.

Denne sesongen er det tre lag som skal rykke direkte opp frå 1. divisjon, noko som fleire satsingsklubbar set stor pris på. Blant dei er velkjente herreklubbar som Molde, Start og Viking.

Laget som blir nummer fire i 1. divisjon skal møte 9.-plassen i Toppserien til play off. Dermed kan potensielt fire lag rykke opp frå nivå to.

Seriestrukturen i Toppserien har gått gjennom mange endringar dei siste åra. Det vore endra talet på lag, det har vore sluttspel på hausten og dette blir det siste året der alle laga skal møtast tre gonger.

Blant dei som har vore usikre på om ei utviding av ligaen var positivt er Caroline Graham Hansen.

Ho fortalde til TV 2 at erfaringa hennar ikkje er at fleire lag nødvendigvis gir høgare kvalitet.

– Den personlege erfaringa mi er at ein tar heller færre lag og færre kampar. Og så får ein heller lage ein ekstra cup eller noko med dei beste laga, dersom ein meiner det er nødvendig, sa ho til TV 2.