Rettar peikefingeren mot politiet etter TV 2-avsløring

I dokumentaren «TV 2 Avslører: Cowboyhattene» avdekkjer TV 2 eit større rumensk nettverk beståande av prostituerte, hatteseljarar, tiggarar og sjåførar.

TV 2 har også avdekka at deler av nettverket driv matlevering for Wolt og Foodora med dei same bilane som dei fraktar prostituerte med.

Det er særleg i Bergen at TV 2 har dokumentert aktivitetane til nettverket. 

Slik deler nordmenn eskorte-erfaringer: «Flink til å suge er hun òg»

Men bergenspolitiet har ikkje sett koplingane mellom det uskuldige salet av populære cowboyhattar og kvinner som sel sex på gata og på nettet.

– Vi har ikkje gjort ei slik kopling og vi har heller ikkje etterforska det, seier politiet sin påtaleleiar Gunnar Fløystad i dokumentaren.

Årsaka

Årsaka er «harde prioriteringar». Mellom anna jobba avsnittet for menneskehandel med andre saker i 2025.

TV 2 får opplyst at det har handla om etterforsking av ungdomskrim, som har vore ei tydeleg politisk satsing det siste året.

Likevel rettar regjeringa peikefingeren mot bergenspolitiet. 

– Riksadvokaten slår fast at politiet skal prioritere å gå etter sentrale personar og bakmenn i kriminelle nettverk og at saker der det er mistanke om menneskehandel, må viast særleg merksemd, seier statssekretær Joakim Øren (Ap) i justisdepartementet til TV 2.

FORVENTAR MEIR: Statssekretær Joakim Øren (Ap) svarar TV 2 på vegner av justisministeren Foto: Vegard Bakke / TV 2

Krev intensivering i arbeidet

Han legg til at regjeringa kom med ein eigen strategi mot menneskehandel i fjor og at dei forventar at politidistrikta leverer.

– I strategien seier vi klart at innsatsen mot hallikverksemd og kjøp av seksuelle tenester er viktig. Både for å avdekke menneskehandel og for å førebyggje menneskehandel til prostitusjon. 

– Politiet skal difor vurdere tiltak for å intensivere innsatsen mot organisert prostitusjonsverksemd, seier Øren.

Så, har noko skjedd etter at TV 2 avslørte dei mange koplingane i det rumenske nettverket?

– Politiet kommenterer ikkje på om vi har pågåande etterforskingar mot miljø eller personar, seier fungerande påtaleleiar Sylvia Myklebust i Vest politidistrikt.

Vedgår ressursmangel

– Sjølv om det er slik at det ikkje er pågåande straffesaker, så vil ikkje det seie at politiet ikkje følgjer med på og samlar informasjon, legg ho til.

Myklebus påpeikar at politidistriktet har styrka innsatsen mot organiserte kriminelle nettverk. 

TV 2 avslører: Cowboyhattene

TV 2 Play

Berre dagar før TV 2-dokumentaren, gjekk politiet ut med at dei hadde sikta ti personar i ei stor narkosak.

– I ein periode i 2025 hjelpte menneskehandelsavsnittet til med etterforsking av alvorleg kriminalitet utført av mindreårige. Ei naudsynt prioritering som vart gjort grunna mangel på etterforskingsressursar i distriktet, seier Myklebust.

– NAUDSYNT PRIORITERING: Fungerande påtaleleiar Sylvia Myklebust (t.v.), her saman med politimeister Ane Kvaal på eit møte med justisministeren om ungdomskriminalitet i Vest politidistrikt. Foto: Jenny Eidesvik / TV 2

Som også hennar forgjengar påpeika, er etterforsking av nettverk som driv menneskehandel og prostitusjon svært ressurskrevjande.

– Inngang til å starte etterforsking og hente inn bevis mot enkeltpersonar i slike saker er utfordrande, med lukka, tause og flyktige miljø.

– Ved konkret mistanke om menneskehandel vil det bli oppretta straffesak då dette er eit prioritert saksfelt. Men mindre alvorlege forhold må til kvar ein tid prioriterast opp mot annan alvorleg kriminalitet.