Riksveg 3 stengt etter brann i eit vogntog

Vogntoget begynte å brenne på riksvegen om lag 9 kilometer nord for Elverum. Det starta i hengaren og spreidde seg raskt.

– Det er full overtenning. Det har spreidd seg til resten av vogntoget og terrenget, sa Frode Øverås hos politiet.

Like før klokka 11 opplyser brannvesenet at dei raskt fekk kontroll på brannen.

– Vi driv med ettersløkking, seier Roger Lyseng som er vaktleiar.

Vegen er framleis stengt i begge retningar forbi staden.

Øverås fortalde at vogntoget truleg er lasta med papp. Det er ein utanlandsk sjåfør av vogntoget på staden. Ingen personar skal vere skadde.