Runa (24) får ikkje erstatning: – Heilt absurd og manglar sunt folkevett

– Hadde lynet slått ned i Runa, hadde ho kanskje fått erstatning. Men når ein blir skadd av ein ball i hovudet, er det ikkje godt nok.

– Det er heilt absurd, og manglar sunt folkevett, seier Mímir Kristjánsson til NRK.

Han står utanfor «rivalen» Vålerengas stadion, men for Viking-supporter og Raudt-politikaren er klubbfargar uvesentlege i denne saka.

Dette handlar om den tidlegare fotballspelaren Runa Lillegård, som for 2,5 år sidan uventa blei treft av ein fotball i hovudet under ein Toppseriekamp mot Stabæk.

Hendinga førte til at ho måtte legge opp som fotballspelar, og sidan har det vore tilnærma umogleg for 24-åringen å konsentrere seg meir enn nokre få minutt av gongen.

NRK har skrive fleire saker om Lillegård:

– Meiningslaus og dum praksis

Likevel blir ikkje hendinga definert som ein yrkesskade, og følgeleg får ho ikkje erstatning av Nav.

Det er Kristjánsson klinkande klar på at ho bør få.

– Ein tenker jo at skadar på jobben er yrkesskadar. Og særleg når du skader deg på grunn av det du jobbar med – i dette tilfellet å få ein fotball i hovudet.

– Men grunngivinga er heilt motsett. Det må skje noko heilt crazy for å få yrkesskadeerstatning. Det er ein meiningslaus og dum praksis, meiner han.

Tar saka til retten – for andres del

Lillegårds sak skal behandlast i rettssystemet i slutten av august etter fleire avslag frå Nav.

– Skulle eg tape i rettssystemet, vil det bety at regelverket er ganske elendig, seier ho til NRK.

Raudt-Kristjánsson meiner at ei politisk endring må til, ikkje berre for profesjonelle fotballspelarar, men også andre som skader seg på jobben.

Om det så skulle skje, vil det ikkje ha noko å seie for Lillegård.

– Men dersom mi sak vil gjere andres kamp lettare ... Det vil det absolutt vere verd det, seier ho frå leilegheita i svenske Helsingborg.

Der er ho sambuar med Oscar Aga, som er fotballspelar på den svenske sørkysten.

Ap: – Skjønner det er tøft

Reglane for yrkesskadeerstatning har ikkje vore endra på 60 år. Men no kan ei endring vere under oppsegling.

Før sommaren skal Stortinget behandle eit forslag frå SV om yrkesskadeerstatning, der hovudfokuset er å betre rettane for belastningsskadar i typiske kvinneyrke. I dag er det slik at 7 av 10 som får erstatning er menn, ifølgje partiet.

Raudt ønskjer å gå enda lengre og kjem til å fremje reglar som gjer at alle som skader seg på jobb, skal få yrkesskadeerstatning.

Arbeidarpartiet la fram eit eige forslag om å endre lovverket rundt yrkessjukdommar og -skader torsdag. Men har framleis ikkje landa på eit konkret forslag om yrkesskadeerstatning.

– Eg skjønner at dette er skikkeleg tøft for henne (Lillegård). Regjeringa er opptatt av å ha eit godt regelverk som varetar arbeidsfolk, seier statssekretær i Arbeids- og inkluderingsdepartementet, Ellen Bakken.

– Men slik reglane er no kan både du og eg risikere å ikkje få ei krone igjen om vi skulle skade oss på jobben?

– Framover må vi i alle fall ha eit godt regelverk som varetar oss begge to. Kva tolkingar som ligg til grunn i akkurat denne situasjonen er opp til rettssystemet å vurdere, seier ho til NRK.

Ser lyset i tunnelen

Ap har lova ei endring i lovverket heilt sidan Hurdalsplattforma blei skriven for 3,5 år sida, men det er framleis uvisst om nokon av forslaga vil få fleirtal.

Etter planen skal forslaget frå SV opp i arbeids- og sosialkomiteen 13. mai.

– Det er krevjande å endre eit så omfattande regelverk. Vi har brukt dei siste åra på å jobbe fram gode forslag, og har nettopp levert inn eit forslag på yrkessjukdom.

– Kristjánsson meiner dagens regelverk manglar «sunt folkevett». Er du einig?

– Det får stå for rekninga hans. Vi må ha eit regelverk som er tilpassa eit moderne arbeidsliv og som varetar arbeidsfolk på jobb.

Sjå ulykka til Lillegård her:

Runa Lillegård er på si side positiv til utviklinga.

– Eg ser eit lys i enden av tunnelen, også for mi eiga sak. No byrjar politikarane å sjå at det er eit problem, seier ho.