Såg ikkje at død mann (89) var skoten i hovudet

Ein 89 år gamal mann vart henta ut frå ein brennande einebustad natt til 15. januar 2025. Men det var ikkje brannen som tok livet hans.

Som TV 2 har avslørt, var 89-åringen skoten i panna, to gongar. Med ei salongrifle med 22 kaliber, som var påmontert lyddempar. 

Politiet har likevel i lang tid meint at mannen mest sannsynleg har skote seg sjølv og tatt sitt eige liv.

– Eg og min bror trur ikkje det er sjølvdrap. Slik vi kjenner hans situasjon og omstenda i saka, har dottera til 89-åringen sagt til TV 2.

TV 2 kan no fortelje at heile etterforskinga fekk ein dårleg start under brannen i fjor.

INFERNO: Brannvesenet rekna huset som tapt allereie ved framkomst. Foto: Bergen brannvesen

Såg ikkje at han var skoten

For politiet, som sjølv rykka ut på brannen natt til 15. januar, oppdaga ikkje der og då at mannen hadde eit kulehol midt i panna.

Det vart dei klar over først 16. januar. Altså over eit døgn seinare.

– Det var Gades institutt som då informerte oss om skotskaden, seier politiadvokat Are Nygård Bergh til TV 2.

No fekk politiet det travelt. Opphavleg var det ikkje tenkt å gjera krimtekniske undersøkingar før 17. januar, då ruinane hadde blitt nok avkjølt.

– Men vi framskunda åstadundersøkinga, og 16. januar blei det gjort funn av ei salongrifle på soverommet der avdøde vart henta ut frå. Obduksjonen av mannen vart gjennomført 17. januar, og då vart det avdekka to innskotsopningar, seier Bergh.

ETTERFORSKAR: Politiadvokat Are Nygård Bergh har fått Kripos si Cold Case-gruppe til å gjennomgå etterforskinga til bergenspolitiet. Foto: Lars Christian Økland / TV 2

Henta ut av brannvesenet

Det var to røykdykkarar frå Bergen brannvesen som bar den livlause 89-åringen ut frå det brennande huset. Utanfor huset vart han, etter kort tid, erklært død av lege på staden.

TV 2 har difor spurt brannvesenet om dei såg at mannen hadde skotskadar i hovudet.

Svaret frå dei er også «nei».

TV 2 er kjent med at fleire bilete tekne av mannen utanfor bustaden skal vise at han hadde eit mørkt og markert sår i panna. 

Ettersom brannen ikkje hadde nådd soverommet, var ikkje kroppen hans forbrent, men berre dels sotete.

– Kvifor såg de ikkje skotskaden?

– Det kan vi ikkje spekulere i. Mannskap på staden antok at vedkommande var omkomen i brannen. Lege på staden gav ikkje indikasjonar på noko anna, svarar Trine Sommerlade, kommunikasjonsleiar og pressekontakt i Bergen brannvesen.

Cold Case-gruppa har fått saka

Etterlatne: – Sinte og skuffa

Salongrifla vart liggande att inne på soverommet. Heile einebustaden brann ned til grunnen den natta. 

I dag veit ikkje politiet kvar og korleis brannen starta. Og dei får heller ikkje henta fingeravtrykk eller DNA frå rifla grunna brannskadane.

Dei etterlatne har vanskeleg for å forstå at verken brannmannskap, lege og politi såg at faren deira var skoten i hovudet.

– Panna hadde merker etter noko som burde vore undersøkt på staden, seier dottera til den avdøde til TV 2.

– Det er rystande, særleg med tanke på kor viktig det er å sikre bevis i ei etterforsking før dei kan bli fjerna eller øydelagd.

Dei meiner både politi og brannvesen ville handla på ein anna måte om dei der og då forstod at 89-åringen ikkje hadde omkome som følgje av brannen. 

Ein potensiell gjerningsperson ville også fått mindre tid til å kome seg unna.

– Eg blir både sint, skuffa og trist, seier dottera.

– Huset var tapt

Politiadvokat Bergh vil ikkje kommentere at heller ikkje brannmannskapa såg kuleholet i panna til 89-åringen.

I lys av at brannårsaka er ukjent og at salongrifla blei liggande igjen i flammane, har TV 2 spurt brannvesenet om kva dei tenkjer om innsatsen sin under hendinga.

Og om dei ville gjort noko annleis om dei hadde oppdaga skotskaden.

– Brannvesenet utførte ein rask og effektiv røykdykkarinnsats under krevjande forhold. Den sakna personen vart hurtig funnen og teken ut. På grunn av brannutviklinga, vart vidare innsats innandørs vurdert som uforsvarleg med tanke på tryggleiken til røykdykkarane, svarar Sommerlade.

Vidare skildrar brannvesenet eit inferno på staden. Huset vart vurdert som tapt allereie då dei kom til staden. 

Likevel sette røykdykkarar i verk ein aksjon som vara i totalt fire minutt.

– Store delar av huset var ikkje mogleg å røykdykke i. I gangen velta flammane rundt i taket og det var gjennombrenning av bjelkelag og nedfall frå tak. Etter fire minutt var det ikkje lenger rekna som trygt, seier Sommerlade.

Brannvesenet gjekk då over til det som blir kalla «utvendig sløkking» som handlar om brannavgrensing og hindre spreiing til terreng.

Etter at TV 2 gjennom fleire saker har fortald om det heilt spesielle bevisbiletet i saka, vart Cold Case-gruppa til Kripos kopla på førre veke.

Dei skal gjere ein gjennomgang av bergenspolitiet sin etterforsking, for å sjå om noko meir bør gjerast for å avdekke eventuelle straffbare forhold.