Såg lysfenomen på himmelen: – Eg fekk gåsehud

Ein NRK-tipsar såg lysfenomenet i Kristiansund på Nordmøre 02.00-tida natt til fredag.

– Plutseleg blei heile himmelen dekka av ei eller anna form for lyssky. Vi stussa veldig på kva det var, fortel tipsaren til NRK.

Personen fortel at han såg lyset i 3–4 minutt før det forsvann. Han fortel at han aldri har sett noko liknande før.

– Eg fekk gåsehud. Det var veldig artig å sjå.

Det har også kome inn meldingar om at lysfenomenet blei observert i Sandnessjøen og på Hamarøy i Nordland.

Truleg russisk rakett

Lysfenomenet har også blitt sett i Sverige og Finland.

Aftonbladet skriv at himmelen blei lyst opp i fleire minutt før fenomenet forsvann.

Expressen skriv at det ifølge russiske medier blei skote opp ei romrakett i løpet av natta.

Denne blei skoten opp frå rombasen Plesetsk i det nordvestlege Russland, på oppdrag frå Forsvarsdepartementet.

Også russiske nettstadar skriv om hendinga.

Romfarts-reporter i NRK, Hallvard Sandberg, seier at det lyset ein ser på himmelen kan ha ulike forklaringar.

– Det kan vere at den brenn andresteget for å kunne lande på jorda igjen, eller så har den akselerert for å sende raketten lenger ut i rommet.

Lyste opp himmelen i januar

Også i januar blei eit lysfenomen observert på himmelen mange stadar i Noreg.

Den gong var det ei rakett frå det amerikanske romfartsføretaket SpaceX.

Dei siste dagane har dei sendt opp fleire rakettar, skriv selskapet på X.