Seks RBK-supportarar er utestengd frå Lerkendal ut sesongen

– Vi har mange andre ting vi heller skulle brukt mannskapa og pengane på, enn vaksne folk som vil slåst og som skaper mykje utryggleik for andre innbyggarar.

Det seier Thomas Kvam, seksjonsleiar for førebyggande og patrulje i politiet i Trondheim.

Men då Rosenborg møtte Brann på Lerkendal i helga stilte politiet mannssterke, både på stadion og i Trondheim sentrum.

– Det henger saman med utviklinga der enkeltpersonar og grupperingar er villige til å utøve vald og oppsøker kvarandre for å provosere fram samanstøyt, skriv politiet i ei pressemelding.

– Valden rammar ofte vanlege tilskodarar og andre i bybiletet og det kan vi ikkje akseptere.

Natt til søndag avskar politiet ei gruppe Rosenborgsupporterar på veg mot ei pub med Brann-supporterar.

No er seks av dei utestengd frå Lerkendal før og etter kamp, resten av sesongen.

Vil beskytte resten av tilskodarar

Seks menn har fått opphaldsforbod på Lerkendal og i Trondheim sentrum 24 timar før kampstart og 24 timar etter kampslutt, på alle offisielle heimekampar til RBK ut sesongen.

– Dette er pålagd for å beskytte resten av tilskodarar på kampane og innbyggarane som ferdast i byen, opplyser politiet.

Fem av personane får i tillegg eit førelegg for å ha unnlate å etterkome politiet sitt pålegg.

For den sjette personen vil politiet sende forslag om tiltale til statsadvokaten for skadeverk mot politibil og forulemping av politiet, i tillegg til å ikkje etterkome politiet sitt pålegg.

Dei utestengde er alle menn, fem av dei i 20-åra og ein av dei i 40-åra.

Totalt sju personar utestengd

Frå før var ein annan supporter allereie utestengd frå Lerkendal stadion, men berre i tre timar etter kampslutt.

Vedkommande fekk etter helga eit nytt opphaldsforbod, som omfattar 24 timar etter kampslutt resten av sesongen.

Dermed er det totalt sju supporterar som er utesteng frå Lerkendal når Rosenborg speler kamp.

– Vi har prøvd å førebyggje med dialog og samarbeid i forkant, men det hjelper ikkje. Vi er nøydd til å stoppe denne type oppførsel og vald i forbindelse med kampane, seier Kvam.