Sjå videoen her: Her spurtar fangen som stakk av frå politiet i crocs

Det er nok fleire som har trekt på smilebandet av katt-og-mus-jakta til politiet i Ålesund denne veka. I rein Olsen-banden-stil klarte ein fange måndag å stikke av gjennom ein open garasjeport i politihuset, med to politifolk hakk i hel.

Eit overvakingskamera i området har fanga inn jakta.

Der kjem mannen i raud joggedress spurtande i full fart på nedsida av politihuset. Nokre sekund seinare dukkar to politifolk opp i filmruta, i litt lågare tempo.

– Eg trudde det var ein joggar, det var berre tilfeldig at eg kikka ut, seier eigaren av overvakingskameraet til NRK.

Han har tidlegare fortalt til NRK at han såg heile opptrinnet.

– Eg såg ut, og da kom det ein mann i heil raud joggedress springande. Eg tenkte; det var jævlig fort han jogga han da, seier mannen.

NRK kjenner identiteten til mannen, men han ønsker ikkje å bli namngitt.

Det var Sunnmørsposten som publiserte videoen av flukta først.

Hadde tyngre kle

Politiet klarte ikkje å halde følgje med mannen, trass i at han sprang i opne crocs, som ikkje er rekna for å vere det beste skotøyet til hurtigløp.

Politiet har fått fleire spørsmål om kvifor dei ikkje klarte å hanke han inn, og tysdag forklarte fungerande politistasjonssjef Arne Lid Skodje korleis det gjekk til.

– Det er eit veldig godt spørsmål. Men han har både lettare kle og har allereie eit forsprang i det han vel å springe, og da hadde han tydelegvis høve til å springe frå politiet, sa han til NRK tysdag.

På filmen ser ein politifolka i full uniform og militærstøvlar.

Kraup fram frå loft

Først etter ni timars leiting var jakta over.

Då kraup 19-åringen fram frå gøymestaden sin: eit loft i Steinvågvegen, berre eit par hundre meter frå politistasjonen.

Dermed var ein av dei mest omfattande politiaksjonane i Ålesund sentrum på lang tid over.

I ettertid har politiet varsla oppvask og endring av rutinane fordi fangen blei lufta i garasjen med open port.

Han som fanga politijakta på overvakingskamera sitt, er imponert over tempoet til fangen.

– Han burde vere atlet og ikkje kriminell, seier han.

Tysdag blei fangen varetektsfengsla i fire veker, mellom anna sikta for vald, tjuveri og truslar.