Sjukehuset har ikkje kapasitet – men no får dei plutseleg 150 nye pasientar i fanget

Leiinga ved Nordlandssykehuset kan ikkje utelukke nye fristbrot, når inntil 150 pasientar, som har fått behandling hos omstridde spesialistlege AS, no blir ført tilbake til sjukehuset.

– Vi har jo framleis utfordringar med kapasiteten. Å seie noko anna vil vere feil.

Det seier viseadministrerande direktør i Nordlandssykehuset, Beate Sørslett, til NRK.

I fem år har det private selskapet Spesialistlege AS tatt imot millionar for å behandle totalt om lag 3.000 psykisk sjuke pasientar frå heile landet, som dei offentlege sjukehusa ikkje har hatt kapasitet til å behandle sjølv.

Pasientane er overførte til det private selskapet gjennom den såkalla fristbrotordninga. Sjukehusa har betalt rekninga.

Men i fjor sommar slo Nordlandssykehuset alarm og slutta å betale fakturaene frå selskapet.

Dei hevdar Spesialistlege AS har fakturert dei over 100 millionar for mykje. Fylkeslegen ved Statsforvaltaren i Nordland slo nyleg fast at det private selskapet har brote helse- og omsorgstenestelova.

I vår slutta også Universitetssykehuset Nord-Norge å betale fakturaene sine til selskapet.

Begge helseføretaka har meldt saka til Økokrim.

Kontraktane mellom Spesialistlege AS og dei to helseføretaka i nord gjekk ut i mars i år, men avtalen sikra også at pasientar som på det tidspunktet var i eit behandlingsforløp, skulle få fullført denne hos det private selskapet. Til saman 662 pasientar med psykiske lidingar.

Selskapet gjekk i august til retten og kravde at sjukehusa gjenopptok betalinga, for å sikre at behandlinga av pasientane blei fullført, men dette blei avvist av Nord-Troms og Senja tingrett.

Dermed må Spesialistlege AS avslutte behandlinga, og overføre pasientane tilbake til dei to helseføretaka i nord.

Kapasitetsutfordringar

Ved Nordlandssykehuset er det om lag 150 pasientar som nå blir ansvaret for sjukehuset igjen.

Men fordi sjukehuset framleis har utfordringar med kapasitet, må dei sjå på om dei kan plassere nokre av pasientane andre stader, seier Sørslett.

– Når desse kjem tilbake må vi sjå kven av dei som skal fortsette forløpet sitt i sjukehuset, og kven av dei som kan vere aktuell for vidare tiltak hos avtalespesialist.

– Kva vil dette gjere med eventuell ventetid for andre pasientar som er i eit behandlingsløp eller ventar på å komme inn i eit?

– Det er derfor vi er opptatte av at vi må bruke den totale kapasiteten som vi har, både med avtalespesialist og annan privatleverandør.

Nordlandssykehuset har framleis avtalar med to private aktørar. Psykologsenteret og Spear Helse.

– Frå Speare og Psykologsenteret har vi fått meir detaljerte fakturaer, og har hatt ein annan dialog ved spørsmål undervegs, som gjer oss tryggare på innhaldet i helsehjelpa. Og at ho samsvarer med faktureringa.

Trur ikkje på lengre ventetid ved UNN

Men det er ikkje berre sjukehuset i Nordland som nå får tilbake pasientar innan psykisk helsevern. Det gjer også Universitetssjukehuset Nord-Noreg (UNN).

Dei må no finne ei løysing for 470 vaksne pasientar og 30 barn som har hatt eit tilbod gjennom Spesialistlege AS. Per no har sjukehuset mottatt om lag 60 pasientar.

– Det er beklageleg at vi ikkje hadde moglegheit til å gi alle pasientane eit tilbod ved UNN innan frist i utgangspunktet, skriv avdelingsleiar Vemund Myrbakk i Psykisk helse- og rusklinikken i UNN i ein e-post til NRK.

Dei siste åra er likevel kapasiteten innan psykisk helse ved sjukehuset styrka, skriv Myrbakk, som også viser til avtalen Helse Nord har med den private aktøren Speare Helse.

No vil alle pasientane med behov for oppfølging bli kontakta av eit team ved sjukehuset.

– Med dei avtalene som er inngått med samarbeidspartar har vi samla sett nok kapasitet.

– Vekker ikkje tillit

Pasient- og brukarombod i Nordland Jannicke Bruvik seier skuldingane mot Spesialistlege AS er svært alvorlege. Samtidig er ho uroa over at pasientar innan psykisk helsevern no får avbroten behandlinga.

– Det er jo ugunstig for pasientane å måtte begynne på nytt med ein ny og ukjend behandlar. Vi har allereie blitt kontakta av pasienter som er i denne situasjonen og er uroa for korleis dei vil bli ivaretatt.

– Kva betydning kan det få for pasientane?

– Det vekker ikkje akkurat tillit. Det vil nok vere dei som kjenner på ei kjensle av at ein ikkje er så viktig, når ein først ikkje blir prioritert i det offentlege helsevesenet, og så må tilbake igjen fordi den private klinikken som skulle hjelpe dei ikkje viste seg tilliten verdig.

Bruvik er også uroa for pasientar innan psykisk helsevern som ventar på behandling vil hamne lengre bak i køen.

– Er eit paradoks

Spesialistlege AS har heile vegen nekta for at dei har tatt for mykje betalt.

– Vi har tilbode våre tenester i samsvar med inngåtte avtalar med Helfo, der timeprisane har vore regulerte og transparent overfor oppdragsgivar, har dagleg leiar Miriam Angell sagt til NRK via advokaten sin Lars Tormodsgard.

Ifølge han er prosessen med å overføre pasientane i gang.

Spesialistlege tok saka til retten i august, argumenterte dei med at det var usikkert om pasientane ville få tilstrekkeleg hjelp av sjukehusa raskt nok. Den oppfatninga delte ikkje tingretten.

– Meiner du det er eit paradoks, i og med at pasientane blei tildelt spesialistlege AS som følge av fristbrot?

– Ja, det er eit paradoks. Det er paradoksalt at fristbrotpasientar som blir tilviste frå sjukehus, blir viste tilbake fordi sjukehuset ikkje betaler rekninga, og slik at fristbrotleverandøren derfor ikkje kan gi framleis helsebehandling til fristbrotpasientane.