Slik bør du forhalde deg til hoggormen

Enkelte stader er hoggormsesongen no i gang, fortel Thor Halvorsen, hoggormentusiast og styremedlem i Norsk Herpetologisk Forening.

På Askøy utanfor Bergen blei det sett ein hoggorm allereie i slutten av februar, ifølge BT.

– Dei stadene der det er relativt mildt, som Sørvestlandet og Østfoldskysten, så startar hoggormsesongen kanskje allereie tidleg i mars, viss snøen er gått og telen begynner å forsvinne. Då vil hoggormane begynne å kome opp, seier Halvorsen.

Men sjølv om ein nokre år kan tenke at det er meir hoggorm enn tidlegare, så stemmer ikkje dette heilt, ifølge Halvorsen.

– Du vil aldri sjå store forskjellar i populasjonen på hoggorm, seier Halvorsen.

Små variasjonar

– Ein høyrer ofte om hoggormår. Det er ein myte, og heng saman med at folk kanskje observerer mykje hoggorm tidleg i sesongen når dei kjem ut. Da ligg dei ofte samla, og dei ligg litt ope, seier Halvorsen.

FLOKK: På starten av våren ligg hoggormane ofte samla, ifølge Halvorsen. Foto: Thor Halvorsen

Han peiker også på at hoggormen som regel får ungar annakvart år, i motsetnad til andre dyr som kan få fleire kull i året.

– Det vil vere naturlege svingingar med tanke på om det litt lite mat det eine året eller om det var berrfrost, då er det fleire som frys i hel på vinteren. Men det er små variasjonar, seier Halvorsen.

Dette bør du gjere

Mange blir ikkje særleg redde av å møte på ein hoggorm. Andre kan bli meir nervøse.

Halvorsen sitt tips til dei som er litt bekymra, er å stoppe opp og observere hoggormen.

– Det er relativt små dyr med ei rekkevidd på 20-30 centimeter. Dei beveger seg ikkje spesielt fort, seier Halvorsen.

ENTUSIAST: Thor Halvorsen er hoggormentusiast og styremedlem i Norsk Herpetologisk Forening Foto: Thor Halvorsen

– Viss du er litt skeptisk og har moglegheita til å stoppe opp, så vil du sjå at dei i utgangspunktet ikkje har interesse av deg før du er så nær at du kan trakke på eller ta på dei. Da vil dei som regel stikke av som sin første reaksjon. Har dei ingen utveg, så bit dei, men det er alltid i forsvar, legg han til.

Ikkje undervurder eit bit

Om ein skulle bli biten, er Halvorsen klar på at ein ikkje må ta for lett på det, sjølv om det som regel går fint.

– Viss du får symptom som kvalme, svimmelheit eller kraftige hevingar som kjem fort, så bør ein oppsøke lege uansett om ein er ung eller gammal, seier Halvorsen.