Sneik seg inn i OL-løypene for å leggje gullplanen: – Heilt nødvendig

– Eg har fått beskjed om at det er vakter der og stengt, men eg klarte å lure meg inn, seier Einar Hedegart.

NRK møter han i italienske Lavazè, berre ein dryg mil unna OL-løypene. Her legg han ned dei siste førebuingane før meisterskapen startar i februar.

Den tidlegare skiskyttaren har satsa for fullt på langrenn den siste sesongen, og no innrømmer han at han allereie har testa OL-løypene.

– Det var ikkje så mange som stoppa meg, så det var berre å spasere rett inn, fortel Hedegart.

Han forklarer at han fekk vere i fred, bortsett frå eit par arbeidarar som heldt på ved anlegget.

– Dei såg berre dumt på meg, dei som jobba der, så det gjekk heilt fint, smiler Hedegart.

Små marginar

NRKs ekspert Fredrik Aukland har forståing for at Hedegart valde å lure seg forbi vaktene for å teste løypene.

– Eg skjønnar naturlegvis at han vil teste løypene før meisterskapet. Det er viktig for han å vere best mogleg førebudd, og det å kjenne løypene godt er ein føresetnad for å lukkast, seier Aukland.

Hedegart er blant favorittane til å vinne 10-kilometeren under meisterskapet. Han har vunne distansen både i verdscupen i Trondheim og under NM på Steinkjer.

Aukland peikar på at på ein 10-kilometer kan marginane vere små.

– Det kjem sannsynlegvis til å bli ein sekundstrid der det kanskje står om tidelar. Den detaljkunnskapen om løypene er heilt avgjerande. At han er så motivert for å bli kjent med traseen, viser berre at han er villig til å gjere jobben som skal til, legg Aukland til.

– Heilt nødvendig

Aukland meiner ikkje at Hedegart fekk eit stort forsprang ved å gå i løypa, men at det handla meir om å tette gapet til konkurrentane.

– Eg trur ikkje han har fått eit stort fortrinn, for dei fleste konkurrentane har gått her før i både Tour de Ski og verdscupen. Men for Hedegart, som ikkje har gått så mange verdscuprenn i langrenn, var dette heilt nødvendig, forklarar Aukland og utdjupar:

– Det er noko eige ved å gå gjennom løypa når stadion er rigga. Det er gjort små justeringar på innkøyringa til mål og utgangen frå start, og det er viktig å vite kva «gir» ein skal velje i dei ulike partia, forklarer eksperten.

Medan dei siste OL-plassane blei delt ut denne veka, har Hedegart kunne førebua seg i lang tid. Sidan han allereie var tatt ut, kunne han stå over Tour de Ski – der mange av konkurrentane fekk testa OL-løypene.

– Så det var fint for å få eit inntrykk av korleis løypa var, for eg har aldri vore det før. Men fekk ikkje hatt noko intervall, eller ja, ikkje noko meir enn berre å få eit inntrykk av det, eigentleg, forklarar Hedegart.

– Tung løype

– Eg legg absolutt ein plan. Jo meir eg lærer løypa å kjenne, jo meir blir den planen til òg, forklarar Hedegart.

Aukland støttar tankegangen og meiner disponering blir nøkkelen i løypene i Val di Fiemme.

– Det handlar om disponering av krefter og å treffe på det vi kallar «pacing». Ein må finne grensa for kor fort ein kan gå ved kvart einaste passeringspunkt for å få høgast mogleg snittfart. Målet er å gå like fort på andre runden som den første, kanskje til og med litt fortare.

Langrennsløparen frå Inderøy vedkjenner at løypene i Val di Fiemme er tyngre enn det han er vand med, og at nettopp disponeringa blir viktig.

– Det er ei veldig tung løype. Tyngre enn eg trur alle løypene eg nokon gong har gått. Så enkelte ting blir veldig viktig. Disponering og kor ein skal porsjonere ut kreftene sine, seier Hedegart og held fram:

– Så det har eg allereie begynt å tenke på, og så blir det litt meir klart jo meir du kjenner løypa. Sånne ting legg eg litt undervegs i løpet, for du veit aldri kva form ein får, seier Hedegart.