Starta året med skattesjokk: – Frå 12.000 til 84.000

– Her kjem vi opp til mora mi sitt hus på toppen. Ho har Noregs finaste utsikt.

Christian Willoch er verje for mora si på 98 år. Tidlegare i januar skreiv han eit innlegg i Budstikka kor han fortalde om korleis regjeringa sin nye skattemodell slår ut på ho.

– Eg har jo høyrt rykte om at det skal blir endra, men ein trur ikkje heilt på det.

Det var først då han sjekka skattemeldinga til mora at han fekk sjokk.

– I fjor betalte ho 12.000 kroner i formuesskatt, og no skal ho betale 84.000 og 45 prosent i skattetrekk. Ho er ikkje minstepensjonist, men ikkje langt unna, seier han.

Årsaka er at bustaden hennar har fått auka marknadsverdi.

Ramma over 300.000 nordmenn

Det viser seg at staten kan få over 500 millionar kroner meir i formuesskatt enn det som var planlagt, skriv Dagens Næringsliv.

Når formuesskatten skal reknast ut, er det stor skilnad på om bustaden din blir verdsett til under eller over 10 millionar kroner.

Her går nemleg grensa regjeringa har sett for dyre bustader, som no blir skatta hardare.

Gjennom den nye skattemodellen har 366.800 nordmenn fått verdien oppjustert i skattekortet i år.

Endringa handlar om at det har kome ein ny måte å rekne på marknadsverdien til ein bustad. Ein såkalla grunnkretsmodell. Det inneber at nokon har fått verdsett bustaden sin for lågt, medan andre har fått verdsett han for høgt.

Skal førast tilbake

Finansminister Jens Stoltenberg (Ap) seier poenget med endringa er eit meir rettferdig system, ikkje å auke staten sine inntekter.

– Så når inntektene blir høgare enn me opphavleg trudde, så skal ekstrainntektene førast tilbake, og akkurat korleis me gjer det, kjem me tilbake til, seier Stoltenberg til NRK.

– Men burde ikkje de føresett at denne berekningsmodellen kunne slå sånn ut?

– Det er eit nytt system, og då er det alltid uvisse. Og når me no får nye tal, så har me bestemt oss for ikkje å venta, men allereie no gjera det klart at det vil bli justeringar.

Han seier at dei som meiner at dei har fått ein for høg marknadsverdi på bustaden, kan justere dette hos Skatteetaten.

– Me har hatt eit system der ein del verdifulle bustader har vore systematisk undervurderte, medan ein del billigare bustader har fått for høg skatt. Det systemet må bli meir rettferdig. Det har me fått på plass. Men utslaga har vorte sterkare enn føresett, og derfor justerer me det no.

Kan vere brot på budsjettavtalen

Endringane finansministeren vil gjera, kan vera brot på budsjettavtalen, meiner budsjettpartnar SV.

– Me må snakka saman, og det er det som er viktig her. For me har ein avtale om statsbudsjett der dette er ein vesentleg del av endringane på skattesystemet, seier finanspolitisk talsperson Marthe Hammer.

Ho understrekar at ho er trygg på at dei vil få til gode løysingar med budsjettpartnarane.