Stor auke i søkartala til sjuke­pleie: Andrine (18) vil ha ein trygg og sikker jobb

Etter mange år med nedgang i søkinga til sjukepleiaryrket, starta ein opptur med fleire søkarar i 2024.

No strøymer endå fleire til. Det viser tala for søking til høgare utdanning, som er lagde fram av Samordna opptak i dag.

Nasjonalt er det ein auke på 39,6 prosent som vil ta sjukepleiestudiet.

Heile tre sjukepleiestudium er i år inne på topp ti-lista med førstegongssøkarar frå Samordna opptak.

Studiet har vore heilt ute av topp ti-lista sidan 2021.

Peikar på at karakterkravet er fjerna

– Eg liker å jobba med folk, og eg vil ta vidareutdanning som jordmor. Difor har eg søkt meg inn på sjukepleiarstudiet til hausten, fortel Andrine Korsvik (18) frå Fitjar i Vestland.

Ho går siste året på vidaregåande skule, og har ekstrajobb i heimesjukepleien på heimstaden.

– Når du tek sjukepleiarstudiet er du sikra jobb, for dei trengst overalt. Og yrket er både teoretisk, men også praktisk, seier ho.

18-åringen trur mange vil bli sjukepleiar fordi det er eit trygt val, men også fordi karakterkravet i matematikk og norsk blei fjerna i fjor.

Til hausten er planen hennar å bli student ved Høgskulen på Vestlandet (HVL) på Stord.

Auke på over 50 prosent

Studiestadene til HVL har ein vekst i talet på søkarar til sjukepleie på 51,3 prosent. Det er fleire enn 1.900 personar som har søkt.

– Det er heilt fantastisk, og eg blei rørt då eg såg tala, seier prorektor for utdanning ved HVL, Anne-Grethe Naustdal.

– I den usikre tida me er i no, trur eg dei unge søker trygge og sikre jobbar, og dei ser eit behov for å bidra.

Ho meiner også det har vore veldig viktig å fjerna karakterkrava.

– Me har fjerna ein barriere for dei som kan ha vore uheldige og fått ein dårleg karakter i norsk eller matematikk. Her har det opna seg moglegheiter for fleire som drøymer om å bli sjukepleiar.

Regjeringa: – Kjempenyheit

Fram mot 2060 vil det vera behov for 180.000 fleire tilsette i helsevesenet, ifølgje Perspektivmeldinga.

Dei ferske søkartala er difor godt nytt for helse- og omsorgsminister Jan Christian Vestre (Ap).

– Dette er eit av dei viktigaste yrka i noreg, og me kjem til å trenge veldig mange sjukepleiarar i åra som kjem. At me då ser ein så kraftig vekst i talet på unge menneske som vil bli sjukepleiarar, er ei kjempenyheit.

Norsk Sjukepleiarforbund har vore sterkt imot å fjerna karakterkravet.

– Men at fleire no søker, kan jo bety at snittet går opp. Det viktige no er at flest mogleg fullfører, og det blir sett inn nok ressursar for å få det til, seier forbundsleiar Lill Sverresdatter Larsen.

– I dag manglar me rundt 6000 sjukepleiarar. Eg er difor veldig glad for at så mange unge no rekk opp handa og seier at dei vil inn i verdas finaste yrke.

Lærarstudiet har snudd nedgangen

Lærarutdanninga har snudd utviklinga i år, etter fem år med nedgang i talet på søkarar. Også her er karakterkrava fjerna.

Auken nasjonalt er på 14 prosent. Ved Universitetet i Stavanger (UiS) er auken 17 prosent.

– Me ser ut til å ha brote den negative trenden og har fått eit fint løft i grunnskulelærarutdanninga. Det er me veldig glade for, seier rektor ved UiS, Klaus Mohn.

Førsteårsstudentane NRK snakkar med, er positive til framtida.

– I det siste har me høyrt mange seia "du må ikkje bli lærar". Men kanskje folk har innsett at det kan vera eit fint yrke likevel, seier lærarstudent Ane Eriksen.

– Dette betyr at me kanskje slepp lærarmangel og at me kan bruka meir ressursar i klasserommet for å gi betre opplæring til elevane, seier medstudent Pernille Cappelen.

– Me har no fleire søkarar enn det er studieplassar til grunnskulelærarutdanningane. Det er ikkje mange år sidan situasjonen var motsett. Regjeringa har tatt fleire grep for å gjera ei god utdanning betre, og me har gjort mykje for å betra arbeidskvardagen til lærarane i klasserommet, seier forskings- og høgare utdanningsminister Sigrun Aasland (Ap).

Studium som opplever nedgang i talet på søkarar, er blant anna reine IKT-studium, realfagstudium, ingeniør- og sivilingeniørutdanningar, filosofistudium, mediefag og samfunnsfag.

Heilt fram til 1. juli står søkarane fritt til å omprioritera mellom vala sine. Svaret på kor dei kjem inn, får dei 20. juli, ifølgje Direktoratet for høgare utdanning og kompetanse.